Зеленский Украинада 1-2 декабрда давлат тўнтаришига уриниш бўлиши мумкинлигини айтди - Ukraine Rossiya dunyo yangiliklar
Сурат манбаси, УНІАН
Украина президенти Владимир Зеленский 1-2 декабрь кунлари мамлакатда Россия иштирокида давлат тўнтаришини амалга оширишга тайёрланилаётгани ҳақида айтган.
Унинг даъво қилишича, давлат тўнтаришида украиналик тадбиркор Ринат Ахметов ҳам иштирок этиши ва бу ҳаракатга миллиард доллар сарфланиши кўзда тутилаяпти.
Алоқадор мавзулар:
«Бизда агентлик маълумоти бор, ҳатто овозли ёзувлар бор, унда Украина вакиллари, таъбир жоиз бўлса, Россия вакиллари билан Ринат Ахметовнинг Украинада давлат тўнтаришида иштирок этишини муҳокама қилишган. Бунга миллиард доллар сарфланиши айтилган», - деди Владимир Зеленский жума куни пойтахт Киевда ўтган матбуот анжуманида.
Зеленскийнинг айтишича, Ахметовнинг ўзи давлат тўнтаришини тайёрламаяпти, аммо уни «Россиядан баъзи вакиллар ва Украинадаги баъзи ўртоқлар» жалб қилишяпти.
«Буни мен Ахметовни менга қарши, давлатга қарши урушга жалб қилиш ҳаракати деб баҳолайман. Бу - вазиятни издан чиқариш», - деди у.
Президент ва хавфсизлик хизматлари тасарруфида бўлган ёзувларда Ринат Ахметовнинг овози йўқ. Шу сабабдан президент уни ўз идорасига чақириб, уларни унга эшиттириб кўрган.
Айни дамда Зеленский журналистларнинг давлат тўнтариши тафсилотлари ҳақидаги саволларига жавоб беришдан бош тортди ва ёзувлардаги одамларнинг исм-шарифларини очиқламади.
Украинанинг энг йирик тадбиркори бўлмиш Ринат Ахметов ДТЭК (Донбасская топливно-энергетическая компания)га эгалик қилади.
Кремль Украинада давлат тўнтаришини тайёрлаётгани борасида режаси борлигини рад этди.
«Россияда бунда иштирок этиш режаси бўлмаган. Россия умуман бунда ишлар билан шуғулланмайди», - деди Президент Путиннинг матбуот котиби Дмитрий Песков.
BBCUZBEK.COM билан Telegram орқали +44 7858860002 номери билан боғланинг.
Telegram каналимиз: https://t.me/bbcuzbek
