Беларусь: Москва дастаклар экан, Лукашенко ҳеч нарсадан қўрқмайдими? - Belarus, Rossiya, Lukashenko, Putin, yangiliklar

Беларусь президенти

Сурат манбаси, Reuters

    • Author, Стив Розенберг
    • Role, BBC, Москва

Янги жазо чоралари билан Европа Иттифоқи Беларусь президентига қаттиқ мужда берди. Аммо янги санкциялар амалда иш берармикан? Россия нашрлари аллақачон буни савол остига олишни бошлашди.

Улардан бирининг ёзишича, "Лукашенкони санкциялар билан қўрқитиб бўлмайди".

Аксинча, "бу уни янада жунбушга келтиради".

Бунинг ортидан, "Ўзидан қароқчи безори қиёфасини яратган"и айтилиб, унинг характерига тавсиф ҳам берилади.

Бу эса, ўз-ўзидан бир саволни пайдо қилади - шундай экан, санкциялар "безори хулқ-атвор"ни ўзгартира оладими?

Аввалги уринишлар иш бермаган, чиппакка чиққан.

Минскка қўндирилган халқаро йўловчи самолёти

Сурат манбаси, HO VIA EPA

Беларусь сохта бомба таҳдиди билан Ryanair халқаро йўловчи самолётини Минскка қўндириб, унинг бортидаги сиёсий мухолифни қўлга олган.

Европа лидерлари мазкур воқеа ортидан, бу каби сурбетларча амалга тоқат қилмасликларини билдириш учун Беларусга қаттиқ мужда беришлари кераклигини яхши англаб етишди.

Skip Энг кўп ўқилган and continue reading
Энг кўп ўқилган

End of Энг кўп ўқилган

Гарчи, қанчалик иш бериши маълум эмаса-да, Беларусга қарши янги санкциялар киритишди.

Улар Беларусь самолётлари учун ўз ҳаво ҳудудларини ёпишди. Ўз ширкатларини Беларусь ҳаво ҳудудидан фойдаланмасликка чақиришди.

Бу молиявий жиҳатдан Минскка яхшигина зарба бериши мумкин.

Бироқ Александр Лукашенко бундан навбатдаги баҳона сифатида фойдаланиши эҳтимоли катта.

У ўзининг атрофидагилар ва Беларусь халқига, "Мана, мен сизга айтгандим, Ғарб бизни агар қурол билан бўлмаса, санкциялар билан вайрон қилишни кўзлаган", - деб айтиши, буни ташқи душманга қарши янада қаттиқроқ курашиш мақсадида қўллаши мумкин.

Президентнинг атрофидагилар бир пас тин олиб, мухолифларига қарши шафқатсиз таъқиб ва тазйиқлари ҳали бир ёнда турсин, тобора иҳоталаниб бораётгани, Лукашенко сиёсатининг иқтисодий оқибатларини назарда тутиб, Беларусь қаёққа қараб кетаётгани ҳақида ўйлаб кўришармикан?

Аммо расмий Москва қўллаб-қувватлар экан, Александр Лукашенко ҳаммаси жойида бўлишига қаттиқ ишонади.

BBCUZBEK.COM билан Telegram орқали +44 7858860002 номери билан боғланинг.

Telegram каналимиз: https://t.me/bbcuzbek