Дунё, янгиликлар: Путин Зеленский билан нимани гаплашди?

Путин ва Зеленский илк бор суҳбатлашдилар

Россия президенти Владимир Путин Украина президенти Владимир Зеленский билан телефон орқали мулоқот қилган. Кремль сўзчиси Дмитрий Песковга кўра, суҳбат Украина ташаббуси асосида ташкил этилган.

"Украина жанубий-шарқидаги ҳолатни тартибга солиш ва ҳар икки томон қўлида сақланаётган шахсларни қайтариш масалалари муҳокама қилинди," маълум қилган жаноб Песков.

Украина: Ҳажвчи президент Собиқ Иттифоқ давлатларига – Бунинг имкони бор!

Президент Зеленский маъмурияти матбуот хизмати жаноб Путин билан телефон суҳбати амалга оширилганини тасдиқлаган. Украина томонининг билдиришича, суҳбат давомидаги асосий масала асирда сақланаётган украин ҳарбий денгизчиларини озод этиш бўлган.

Ўтган йилнинг ноябрь ойида 24 нафар украиналик денгизчи Керч бўғозида Россия томонидан қўлга олинган эди. Россия уларни чегарани ноқонуний кесиб ўтишда айблаб келади.

БМТ Филиппиннинг нарко-савдогарларга қарши урушини текширмоқчи

БМТ Инсон Ҳуқуқлари Кенгаши Филиппин президенти Родриго Дутертенинг наркотик моддалар сотувчиларига қарши бошлаган қаттиққўл кураши бўйича текширув ташкиллашга овоз берди.

Текширув давомида судсиз ўлдиришлар, ноқонуний ҳибслар ва изсиз ғойиб бўлган шахслар масалалари ўрганилади.

Филиппин ҳукумати БМТнинг ушбу қарорига кескин қарши чиқиб, ўтказилажак текширувни «бемаъни томоша» дея атаган.

Президент Родриго Дутерте наркотик савдосига қарши қаттиққўл курашини 2016 йилда эълон қилган. Шундан бери полиция ҳисоб-китобларига кўра, камида, 6,600 нарко-савдогар ўлдирилган. Бироқ инсон ҳуқуқлари фаоллари 27 мингдан зиёд инсон наркотик савдосида гумонланиб, йўқ қилинганини таъкидлайди.

Ўтган ҳафта 3 яшар қизча ушбу курашнинг энг ёш қурбонига айланган. Полиция қизнинг отаси ундан жонли қалқон сифатида фойдаланганини иддао қилади, аммо оила аъзолари бу даъвони рад этмоқда.

MH370 рейси учувчиси ўз жонига қасд қилган бўлиши мумкин

2014 йил 8 март куни Малайзия пойтахти Куала-Лумпурдан Пекинга парвоз қилаётган Malaysia Airlines'га тегишли MH370 рейсидаги учоқ Ҳинд Уммони устида радарлардан ғойиб бўлган эди.

Франциялик терговчилар ўтказган текширув хулосаларига кўра, учувчи Заҳарий Аҳмад Шоҳ ўз жонига қасд қилган ва бортда жойлашган 239 нафар инсоннинг ҳам умрига зомин бўлган бўлиши мумкин.

Ушбу фараз учувчининг, эҳтимолан, тушкунликдан азият чекканига оид хабарларга асосланган. Терговчилар тушкунликка тушиб қолган учувчи йўловчиларни кислород билан таъминлаш тизимини ўчириб, сўнг учоқни Ҳинд Уммони сувларига урганини тахмин қилмоқда.

Айни дамда, MH370 рейсининг ғойиб бўлиш ҳолатини фақатгина Франция ўрганмоқда. Самолёт бортида уч нафар Франция фуқароси бўлган эди.

Ҳозирча, учоқнинг тақдири бўйича тугал хулосага келинмаган бўлса ҳам, экспертларнинг MH370 рейси ҳаракатини бошқача йўлда изоҳлаб бериши қийинлиги айтилади.

Техаслик аёл онасининг жасади билан бир уйда уч йил яшади

АҚШнинг Техас штатида яшовчи аёл онасининг жасадини уч йил давомида ўзининг икки хоналик уйида сақлаб келаётгани учун ҳибсга олинган.

Полициянинг ишонишича, 71 яшар она 2016 йилда қоқилиб тушиб, оламдан кўз юмган.

Унинг 47 ёшли қизи қоқилиш натижасида ҳаёт учун хавфли бўлмаган жароҳат олган онасига вақтида ёрдам кўрсатмагани, унинг бир неча кун ичида қийналиб ўлишига йўл қўйиб бергани учун қўлга олинган.

Деярли чириб бўлган тана қолдиқлари уйдаги ётоқхона полидан топилган. Аёл эса 18 ёшли қизи билан қўшни хонада яшаб келган.

Полиция бувиси ўлган пайтда набиранинг 15 ёшдан кичик бўлгани ва унинг онаси «15 ёшдан кичик болага руҳий зарар етказиш»да ҳам айбланаётганини маълум қилган.

Эндиликда, аёл 20 йил озодликдан маҳрум этиш жазоси ва $10,000 миқдоригача жарима билан юзланиши мумкин.

BBCUZBEK.COM билан Telegram орқали +44 7858860002 номери билан боғланинг.

Telegram каналимиз: @bbcuzbek