Ўзбекистон, Тошкент: Сиёсат эркаклар ишими ёки постимнинг Мирзиёев сиёсатига алоқаси йўқ

Қачонки сиёсатда аёллар билан болалар ҳукм юргизадиган пайт келса, билинг, мамлакат тез орада пароканда бўлади...

Халқ депутатлари туман кенгаши депутати Қобил Дусовнинг айни шу Facebook пости атрофидаги акс-садолар орадан қарийб икки ой ўтиб ҳам давом этмоқда.

Депутат ўз постини шу йилнинг 7 май куни чоп этган, унинг бу изҳороти орада кечган вақт давомида турли ижтимоий тармоқ фойдаланувчиларининг нигоҳига тушган мавзулардан бирига айланган.

Пост ўнлаб коментларга сабаб бўлган, айниқса, бу борада ўзбекистонлик хотин-қиз интернет фойдаланувчилари ниҳоятда фаоллик кўрсатишган.

Уларнинг муносабатлари ўзининг анчайин кескинлиги билан ҳам алоҳида эътибор тортмай қолмаган.

Демократия ва инсон ҳуқуқлари институти директори Сайёра Хўжаева ана шундай аёлларнинг сўнггиларидан бири бўлган.

Сайёра Хўжаева Қобил Дусов пости аслини улашаркан, ўз постини унга кириш сўзи тариқасида кеча, 25 июн куни ўзбек ва рус тилларида ўзининг "Facebook"даги шахсий аккаунтида қолдирган.

"Кабул Дусов! Қизлар, бу йигитча Президент сиёсатига, биз - аёлларга қаршилардан! Яна депутат эмиш, Россия ва Германияларда ўқиганмиш...Худо асрасин, мана шундайларни қўлига ҳокимиятни бериб қўйсак! Фожеа!", - деб ёзган. У ўз постидаги деярли ҳар бир жумлани ундов белгиси билан якунлаган.

Орадан соат ўтиб, "Балки, "Миллий Тикланиш" (Қобил Дусов аъзоси бўлган - таҳр.) партияси Президент ва у сайловларга ўз номзодини илгари сурган ЎзЛиДеп га мухолифатдадир. Шу боис, намояндаларининг фикрлари ҳар доим ҳам мамлакат раҳбарининг фикрлари билан мувофиқ бўлиши шарт эмасдир...", деган илова билан , "Қонун ва депутатлар - бир-бирига зид тушунчаларми? Ёки барибир мувофиқми", номли сарлавҳа остидаги яна бир мақолани улашади.

Бугун эса, унинг эътиборидан "Миллий Тикланиш" партияси раҳбарининг бу хусусда uz24.uz да чоп қилинган муносабати ҳам четда қолмайди.

Партия лидери Алишер Қодировга кўра, "Эълон қилинган постлар унинг шахсий фикрлари бўлиб, ушбу фикрлар "Миллий тикланиш" демократик партиясининг мақсад ва ғояларига тамоман зиддир".

uz24.uz хабарининг ўзи "Алишер Қодиров депутат Кабул Дусовнинг аёллар ва ёшлар масаласига оид шахсий фикрларини қоралади", деб номланади.

"Ўзбекистонда аёлларнинг ўз жонига қасд қилиши соат сайин ошмоқда"

"Мирзиёев ҳам кўпхотинлиликни йўқотолмайди"

Ўзбекистонда Ислом: кеча, бугун, эртага

Акс-садо

Депутат Қобил Дусов постига унинг "Facebook" саҳифасида ўз фикрларини билдирган ўнлаб интернет фойдаланувчиларининг аксарияти ҳам хотин-қизлар бўлишган.

Афтидан, уларнинг бу қадар фаолликлари депутат ўзини ҳам таажжубга солмай қўймаган.

Қобил Дусов, таъбир жоиз, фикр билдираётганлар "сафига қўшилиб", "Опа-сингилларим бугун жудаям фаолми, дейман? Раҳмат, сизларга, эй жаннат калитлари", - деб ёзиб қолдирган.

Депутат постига ўз муносабатини билдирган Khon Khurshidovna наздида, "Bu ayol aqliga aqli yetmagan, hali ham kuch ishlatib, buyruq, bosim bosish tarafdori bo'lgan 19- asrdan qolib ketgan omi erkaklarning fikri bo'lgan!).

Зумрад Ахмедова эса, "Англияни Бош министри Маргарит Тетчер бошқарди. Ҳиндистонни Индира Ганди. Беназир Бхутто-чи. Яна мисол кўп. Ҳеч қанақа мамлакатни пароканда килишмади улар", - деган.

Guljahon Güneş нинг ёзишича, "Ayollarni mardikor, xizmatkor qilib qadrlamaydigan , huquqlarini cheklab, tazyiq o'tkazadigan yurt rivojlanmaydi".

Айни мазмундаги коментлар манзарасида депутат Қобил Дусов яна бир бор "аралашиб", "Азиз аёллар, бу менинг гапим эмас, жуда катта улуғ алломаларнинг гаплари. Китобларида тарихдан минглаб мисоллар келтириб, шу хулосаларни ёзганлар", - дея фикр қолдирган.

Зумрад Ахмедова эса, Кабул Дусовга "Момомиз Тўмарисни эсланг. Бибихонимнинг заковати олдида ҳукмдорлар бош эгган", - дея яна жавоб қайтарган.

Аммо бу каби интернет фойдаланувчилари орасида депутатнинг фикрларини қўллаб-қувватлаганлари ҳам кўрилган.

Жумладан, Memnuna Hasanboyeva, "Kim nima degan taqdirdayam, har kim öz ornini bilishi lozim. Oila boshligi erkakdir, yani turmish ortoğimizdir. Har doim bizdan bir poğona yuqorida turishadi va shunday bolib qoladi hamisha", - деган.

Муслима Умарова ҳам, "Тўғри,чунки аёллар ва болалар ожиз қатлам. Алдовларга тез учади-да", - деб ёзган.

Кибер фазода тинмаётган бу каби акс-садолар, афтидан, айрим маҳаллий интернет нашрлари ижодкорларини ҳам беэътибор қолдирмаган.

repost.uz интернет нашри депутат Қобил Дусов билан боғланиб, "масалага ойдинлик" киритишга уринган, энг аввало ўз пости билан нима демоқчи бўлгани билан қизиққан.

Депутат ўз пости қўзғаган "баҳсу мунозара ва муҳокамалардан хабардор экани, улардан айримларига ҳатто жавоб бериб ўтирмагани"ни айтган.

"Кўплар менинг постимни тўғридан-тўғри Танзила Норбоеванинг Сенат раиси этиб тайинланишига боғлашаяпти. Аммо постимнинг мамлакатдаги сиёсий воқеълик ва президент сиёсатига ҳея бир алоқаси йўқ", - деган Қобил Дусов.

Унга кўра, "ўз постида билдирган бу каби фикри тарих исботлаган ҳақиқатдир".

Гендер тенглик

repost.uz нинг депутат билан суҳбати шахсан Президент Шавкат Мирзиёев таклифи билан Ўзбекистон Хотин-қизлар қўмитасининг собиқ раҳбари Танзила Норбоева Олий Мажлис Сенати раиси этиб сайланиши ортидан саноқли кунлар ўтиб бўй кўрсатган.

Танзила Норбоева ушбу сайлов-тайинлов ортидан Ўзбекистон тарихида бу каби мақомга лойиқ кўрилган биринчи ва ҳозирча ягона аёл сиёсатчига айланганди.

Сенат раиси ўзи эга бўлган Конституцион ва бошқа қонуний ваколатлари билан Ўзбекистонда президентдан кейин мамлакатда иккинчи муҳим шахс саналади.

Айнан Олий Мажлис Сенатининг айни шу, 21 июн кунги ялпи мажлиси чоғида Президент Шавкат Мирзиёев гендер тенглик масаласига алоҳида эътибор қаратган, тўхталиб ўтган.

Президент Сенатда Хотин-қизлар ва гендер тенглик масалалари бўйича қўмита тузишни таклиф қилишгача борган.

Бу каби қўмита мамлакатда шу пайтгача мавжуд бўлмагани, фаолияти юритмаганини хосан қайд этган.

Аммо президентнинг нутқидан гендер тенглик билан боғлиқ муаммо Ўзбекистонда қанчалар долзарб экани англашилмаган.

Бу ҳақда берилган хабар, ёзилган шарҳ ва чиқишларда ҳам бу мавзу жиддий эътибор топмаган.

Маҳаллий кузатувчиларга кўра, депутатнинг мазкур пости ва унинг атрофидаги баҳсу мунозараларнинг қанчалик қизғинлиги, бир маънода, мамлакатдаги гендер тенглик билан боғлиқ ҳақиқий аҳволни ўзида акс этдирмай қолмаган.

Бошқа томондан, гендер тенглик масаласи билан бевосита боғлиқ бунга ўхшаш ошкора пост ва бу қадар жиддий акс-садолар ҳам Ўзбекистоннинг бу яқин тарихида кузатилмаган воқеълик бўлади.

Ўзбекистон аҳолисининг деярли ярмига яқинини хотин-қизлар ташкил этишади.

Уларнинг мамлакат ижтимоий, иқтисодий ва айниқса, сиёсий ҳаётида фаолликлари, иштироклари қанчалик шу рақамларга мос экани саволи эса, Ўзбекистонда ҳали-ҳануз ўзининг тўлиқ жавобини топмай келаётган мавзу, муаммолардан бири бўлади.

Аксарият аҳолиси мусулмон бўлган Ўзбекистонда жамият ўзининг анъанадор экани билан ҳам алоҳида ажралиб туради.

BBCUZBEK.COM билан Telegram орқали +44 7858860002 номери билан боғланинг.

Тelegram каналимиз: https://t.me/bbcuzbek