’برطانوی لڑکیوں کے سفرِ شام کی فوٹیج منظر عام پر‘
،تصویر کا ذریعہBBC World Service
شدت پسند تنظیم دولتِ اسلامیہ میں ممکنہ طور پر شمولیت کے لیے ترکی کے راستے شام جانے والی تین برطانوی لڑکیوں کے ترکی میں سفر کی سی سی ٹی وی فوٹیج سامنے آئی ہے۔
15 سالہ شمیمہ بیگم اور عامرہ عباسی اور 16 سالہ خازیدہ سلطانہ نے 17 فروری کو لندن سے استنبول روانہ ہوئی تھیں۔
سی سی ٹی وی فوٹیج میں 18 فروری کو یہ تینوں لڑکیاں استنبول میں بس سٹیشن پر بیٹھی دیکھی جا سکتی ہیں۔
سکاٹ لینڈ یارڈ کا کہنا ہے کہ تینوں لڑکیاں ترکی سے شام چلی گئی ہیں اور دولت اسلامیہ کے جنگجوؤں سے ان کی ملاقات سرحد پر ہوئی ہو گی۔
بی بی سی کے خیال میں ان لڑکیوں نے بس سٹینڈ پر قائم دو بس کمپنیوں کے دفاتر میں انتظار کیا اور اس کے بعد شام کی سرحد کے قریب ترکی کے علاقے عرفا کی بس میں بیٹھ گئیں۔
ایک اندازے کے مطابق یہ تینوں لڑکیاں 18 گھنٹے تک بس سٹینڈ پر موجود رہیں۔
سی سی ٹی وی سے لی گئی تصاویر17 فروری 18:27 جی ایم ٹی اور 18 فروری 11:22 جی ایم ٹی کے درمیان لی گئی ہیں۔
،تصویر کا ذریعہAP
ذرائع کا کہنا ہے کہ تینوں لڑکیاں پانچ یا چھ روز قبل ترکی اور شام کی سرحدی کراسنگ کلس کے قریب سے شام میں داخل ہوئی ہیں۔
End of سب سے زیادہ پڑھی جانے والی
اس سے قبل برطانوی سکیورٹی ایجنسیاں تنقید کی زد میں ہیں کیونکہ ترکی پہنچنے والی طالبہ شمیمہ نے برطانیہ چھوڑنے سے قبل سماجی رابطے کی ویب سائٹ ٹوئٹر پر اقصیٰ محبوب کو پیغام بھیجا تھا۔
یہ وہی اقصیٰ ہیں جو 2013 میں دولتِ اسلامیہ کے جنگجو سے شادی کرنے کے لیے گلاسکو سے شام پہنچی تھیں۔
اقصیٰ کے خاندان کے قانونی معاون کا کہنا ہے کہ اقصیٰ کا ٹوئٹر اکاؤنٹ برطانوی پولیس کی زیرِنگرانی تھا۔
ادھر شام جانے والی تین لڑکیوں کے سکول کے پرنسپل کا کہنا ہے کہ اس بات کے کوئی شواہد نہیں ملے کہ یہ لڑکیاں سکول میں بنیاد پرست نظریات کی جانب مائل ہوئیں۔
تینوں لڑکیوں کے اہلِ خانہ نے ان سے گھر واپسی کی اپیل کی ہے۔
