شامی کیمیائی ہتھیار: امریکہ روس میں اتفاق
سفارت کاروں کے مطابق امریکہ اور روس نے شام کے کیمیائی ہتھیاروں کے خاتمے کے لیے ایک قراداد کے مسودے پر اتفاق کر لیا ہے۔
سفارت کاروں کا کہنا ہے کہ یہ قرارداد پیش کرنے کے لیے اقوامِ متحدہ کی سلامتی کونسل کا اجلاس جمعے کو طلب کیا گیا ہے جس میں اس قرارداد پر بحث کی جائے گی۔
اس اتفاقِ رائے کو امریکہ اور روس کی جانب سے طے کیے گئے معاہدے کے بعد ایک اہم قدم قرار دیا جا رہا ہے جس کے تحت شام نے اپنے کیمیائی ہتھیاروں کے زخیرے کو 2014 کے آخر تک ختم کرنے پر اتفاق کیا تھا۔
امریکہ اور روس کے درمیان اس قراداد کے الفاظ پر بہت سے اختلافات تھے۔
روسی وزیر خارجہ سرگئی لاوروف نے تصدیق کی کہ اتفاقِ رائے ہو چکا ہے مگر انہوں نے بتایا کہ اس میں اقوامِ متحدہ کے باب سات کے تحت براہ راست مداخلت کی دھمکی شامل نہیں ہے جس کے تحت فوجی کارروائی کی اجازت ہوتی ہے۔
اس کے لیے سلامتی کونسل کی ایک اور قرادار کی منظوری کی ضرورت ہو گی مگر اس کے باوجود امریکی وزارتِ خارجہ کے ایک اہلکار نے اسے ایک بڑی کامیابی قرار دیا ہے۔
اس اہلکار نے نام نہ بتانے کی شرط پر بتایا کہ یہ ’دستاویز اس بات کو واضح کرتی ہے کہ بشار الاسد کی حکومت کی جانب سے عدم تعاون کے نتیجے میں اسے سخت نتائج کا سامنا کرنا پڑے گا۔‘
امریکہ جس کی حمایت فرانس اور برطانیہ کر رہے ہیں نے اس قرارداد میں فوجی مداخلت کی دھمکی کو شامل کرنے کی بات کی مگر روس اس کا مخالف ہے۔
End of سب سے زیادہ پڑھی جانے والی
امریکہ اور روس کے درمیان معاہدے کے بعد شام پر اڑھائی سال سے موجود تعطل ٹوٹا تھا کیونکہ روس اور چین تین بار مغربی ممالک کی جانب سے اقوامِ متحدہ کی سلامتی کونسل میں پیش کردہ قرارداد کو ویٹو کر چکے ہیں۔
