ٹرمپ کا صدارتی مباحثے سے پہلے ہلیری کے ڈرگ ٹیسٹ کا مطالبہ

امریکہ میں صدر کے عہدے کے لیے رپبلکن امیدوار ڈونلڈ ٹرمپ نے کہا ہے کہ ان کا اور ان کی حریف ڈیموکریٹک امیدوار ہلیری کلنٹن کا منشیات ٹیسٹ ہونا چاہیے۔

انھوں نے کہا ہے کہ دونوں کے درمیان اگلے صدارتی مباحثے سے قبل دونوں کا منشیات ٹیسٹ ہونا چاہیے۔

نیو ہیمپشائر میں ریلی سے خطاب میں انھوں نے انتخاب میں ممکنہ دھاندلی کا الزام بھی عائد کیا۔

انھوں نے الزام عائد کیا کہ گذشتہ مباحثے میں ہلیری پر انتہائی پرجوش تھیں لیکن آخر میں وہ کار تک بھی مشکل سے پہنچیں۔ تاہم انھوں نے اس کے لیے کوئی ثبوت پیش نہیں کیا۔

ٹرمپ کا یہ بیان ایسے وقت میں آیا ہے جب ان پر کئی خواتین نے جنسی حملوں کے الزام لگائے ہیں۔

اس کا آعآز اس ریکارڈنگ کے منظرِ عام پر آنے کے بعد ہوا جس مں انھوں نے خواتین کے بارے میں نازیبا کلمات کہے۔

اس ویڈیو پر شدید تنقید کے بعد انھوں نے معافی مانگی تھی اور اسے بند کمرے میں ہونے والی گفتگو قرار دیا تھا۔ تاہم خواتین کے جنسی حملے کے الزامات کو انھوں مسترد کیا۔

انتخابی سروے کے مطابق یہ الزام لگنے کے بعد ٹرمپ کئی اہم انتخابی ریاستوں میں اپنی مقبولیت کھو رہے ہیں۔

بعدازاں فلوریڈا میں اپنے حامیوں سے خطاب کرتے ہوئے مسٹر ٹرمپ کا کہنا تھا کہ خواتین کی جانب سے ان پر لگائے جانے والے الزامات 'خوفناک حد تک جھوٹے ہیں۔'

انھوں نے کہا کہ میڈیا ان کی حریف ہلیری کلنٹن کی ملی بھگت سے یہ الزامات عائد کر رہا ہے۔

اس سے قبل امریکی صدر باراک اوباما کی اہلیہ مشیل اوباما نے ہیمپشائر میں اپنے خطاب میں عورتوں سے متعلق ٹرمپ کے عمل کے بارے میں کہا کہ یہ تذلیل پر مبنی اور قابلِ نفرت ہے۔

ان کا کہنا تھا کہ رہنماؤں کو بنیادی انسانی شائستگی پر پورا اترنا چاہیے۔

امریکہ میں نئے صدر کے انتخاب کے لیے ووٹنگ نومبر میں ہونی ہے۔