کاشف قمر بی بی سی اردو ڈوٹ کام، اینٹیگا، ویسٹ اینڈیز

	بنگلہ دیش پونٹنگ، ہیڈن اور گلکرسٹ جیسے بڑے ناموں سے سے خائف نہیں ہے: حبیب البشر

سنیچر کا میچ بنگلہ دیش کا سپر ایٹ مرحلے کا پہلا اور آسٹریلیا کا دوسرا میچ ہوگا۔زیادہ تر مبصرین کے خیال میں آسٹریلیا کی موجودہ فارم کے پیش نظر اس میچ میں کسی حیران کن نتیجے کا امکان کم ہی ہے۔

اس کے باوجود بھی آسٹریلین کپتان رکی پونٹگ کہتے ہیں کہ ان کی ٹیم بنگلہ دیش کے خلاف میچ کو بھی کسی بھی دوسری مضبوط ٹیم کے خلاف مقابلے کے طور پر ہی لے رہی ہے۔

پونٹنگ کے مطابق ان کی ٹیم بنگلہ دیش کا مقابلہ بالکل ایسے ہی کرے گی جیسے جنوبی افریقہ، نیوزی لینڈ یا ویسٹ انڈیز جیسی ٹیموں کا۔

ان کہنا تھا کہ بنگلہ دیش بہت اچھی ٹیم ہے اور ایک روزہ کرکٹ تو ایسی ہے کہ میچ کے دن ذرا سی غلطی مہنگی پڑ سکتی ہے لہٰذا آسٹریلین ٹیم تو بہترین کارکردگی اور نتیجے کے لیے ہی میدان میں اترے گی۔

رکی پونٹنگ کا یہ بھی کہنا تھا بنگلہ دیش کی پرفارمنس جس طرح بہتر ہوئی ہے اور وہ جیسے سپر ایٹ میں پہنچے ہیں، اس کی روشنی میں بنگلہ دیش کو معمولی نہیں سمجھا جاسکتا۔

بنگلہ دیش کے کپتان حبیب البشر کے مطابق ان کی ٹیم آسٹریلیا کو ہرا سکتی اور اگر ایسا ہوا تو اس بار لوگوں کو بہت حیرانی نہیں ہوگی۔

ان کے مطابق عالمی کپ کا ابتدائی مرحلہ ان کی ٹیم کے لیے زیادہ سخت تھا کیونکہ ابتدائی مرحلے میں تو ان کی ٹیم ہر میچ اپنا آخری میچ سمجھ کر کھیل رہی تھی جبکہ سپر ایٹ میں کم از کم چھ میچ کھیلنے کا تو موقع ہے۔

حبیب البشر نے یہ بھی کہا ان کی ٹیم میک گرا جیسے بولروں اور پونٹنگ، ہیڈن اور گلکرسٹ جیسے بڑے ناموں سے سے خائف نہیں ہے۔