 | | | شعیب ملک اب فٹ ہیں۔ |
پاکستان کرکٹ بورڈ نے انگلینڈ کے خلاف پانچ ایک روزہ میچوں کی سیریز کے لیئے ٹیم کا اعلان کر دیا ہے۔ زخمی شعیب ملک اور شاہد یوسف کو سکواڈ میں شامل کرنے کا فیصلہ کیا گیا ہے جبکہ انگلینڈ سے محمد سمیع، فیصل اقبال اور شاہد نذیر کو واپس پاکستان بھیجنے کا فیصلہ بھی کیا گیا ہے۔ ایک روزہ سیریز ٹیسٹ میچوں کے خاتمے پر تیس اگست سے شروع ہوگی۔ ٹیم میں تبدیلی کا فیصلہ پاکستان کرکٹ بورڈ کی سلیکشن کمیٹی نے کیا ہے۔ آل راؤنڈر شعیب ملک کو انگلینڈ کے خلاف سیریز کے آغاز پر ہی کُہنی میں تکلیف کے سبب واپس پاکستان آنا پڑا تھا۔ اب وہ فٹ ہیں۔ شعیب ملک کا کہنا تھا کہ انہیں اب بولنگ یا بیٹنگ کے دوران کوئی تکلیف محسوس نہیں ہو رہی ہے۔ تیسرے نمبر پر بیٹنگ کرنے والے شاہد یوسف کا تعلق بھی شعیب ملک کی طرح سیالکوٹ سے ہے۔ بیس سالہ شاہد پہلی مرتبہ پاکستانی سکواڈ میں شامل ہوئے ہیں۔ وہ پاکستان اکیڈیمی ٹیم کے کپتان ہیں۔ انہوں نے حال ہی میں اے ٹیم کے رکن کی حیثیت سے آسٹریلیا کا دورہ کیا تھا۔ وہ کچھ عرصے سے مقامی کرکٹ میں بھی اچھی کارکردگی کا مظاہرہ کر رہے ہیں۔ شاہد نے سکواڈ میں شمولیت پر خوشی کا اظہار کیا اور کہا کہ ان کی خواہش ہے کہ وہ پلینگ الیون کا بھی حصہ بنیں۔ | 
ایشیا کپ، سہیل اور وسیم دستیاب
