مناء رانا بی بی سی اردو ڈاٹ کام لاہور

	پاکستان کرکٹ بورڈ کے اراکین

پاکستان کی ٹیم کے لیئے فٹ نس کیمپ اکیس کھلاڑیوں پر جبکہ اے ٹیم کے کیمپ کے لیئے انتیس کھلاڑیوں کا اعلان کیا گیا۔ دونوں ٹیموں کے کیمپ 25 مئی سے شروع ہوں گے۔ پاکستان ٹیم قذافی سٹیڈیم میں جبکہ اے کرکٹ ٹیم نیشنل کرکٹ اکیڈمی میں ٹریننگ کرے گی۔

پاکستان کرکٹ بورڈ کے میڈیا ڈائریکٹر عباس زیدی نے کیمپ کھلاڑیوں کے ناموں کا اعلان کرتے ہوئے کہا کہ یہ فٹ نس کیمپ پچیس مئی سے پانچ جون تک لگایا جائے گا اور دونوں ٹیموں کا اعلان نو جون کو کر دیا جائے گا اور پھر ان ٹیموں کا باقاعدہ کرکٹ کیمپ بارہ جون سے 20 جون تک لگایا جائے گا اور اس کیمپ میں صرف سکواڈ میں شامل سولہ کھلاڑی ہی تربیت کریں گے۔

عباس زیدی نے کہا کہ جو قومی اور اے ٹیم کے کھلاڑی آج کل انگلینڈ میں کاؤنٹی یا لیگ کرکٹ کھیل رہے ہیں انہیں فٹ نس کیمپ سے مستثنیٰ قرار دے دیا گیا ہے تاکہ ان کے معاہدے متاثر نہ ہوں، البتہ ٹیم کے اعلان کے بعد ان کھلاڑیوں پر لازمی ہوگا کہ کرکٹ کیمپ میں شریک ہوں۔

اے ٹیم کے لیئے زیادہ کھلاڑیوں کے اعلان کی بابت عباس زیدی نے بتایا کہ اے ٹیم کے کیمپ میں انڈر 19 کے چار فاسٹ بالر شامل کیئے گئے ہیں تاکہ انہیں بھی تربیت دی جا سکے۔

پی سی بی کے میڈیا ڈائریکٹر نے کہا کہ جونٹی روڈز کرکٹ کیمپ کے دوران لاہور میں ہوں گے اور باری باری دونوں ٹیموں کی فیلڈنگ میں کوچنگ کریں گے۔

پاکستان ٹیم کے کیمپ کے لیے کھلاڑی یہ ہیں
انضمام الحق، یونس خان، محمد یوسف، عبدالرزاق، شعیب اختر،
شاہد آفریدی، محمد سمیع، شعیب ملک، رانا نوید الحسن، کامران اکمل، سلمان بٹ، دانش کنیریا، عمران فرحت، توفیق عمر، محمد آصف، عمر گل، فیصل اقبال، راؤ افتخار، عاصم کمال، بازید خان اور ذوالقرنین حیدر۔

پاکستان اے ٹیم کا فٹ نس کیمپ ان کھلاڑیوں پر مشتمل ہے
مصباح الحق، یاسر حمید، حسن رضا، رفعت اللہ مہمند، محمد حفیظ، شاہد یوسف، شہزاد ملک، فواد عالم، نوید لطیف، یاسر عرفات، محمد سلمان، امین الرحمن، وسیم خان، عبدالرحمن، طاہر خان، محمد ارشاد، اسد علی، انور علی، اختر ایوب، جمشید احمد، نجف شاہ، آصف حسن، منصور امجد، محمد خلیل، رضوان اکبر، سمیع اللہ نیازی، سعید انور جونیر، عمران طاہر اور نعمان اللہ۔