عبدالرشید شکور بی بی سی اردو ڈاٹ کام، کراچی

گریگ چیپل کو دنیائے کرکٹ کا عظیم کھلاڑی مانا جاتا ہے

پاکستان کرکٹ بورڈ کے چیف ایگزیکٹیو رمیز راجہ نے بی بی سی کو بتایا کہ گریگ چیپل نے پاکستان کرکٹ بورڈ کے ساتھ کام کرنے پر رضامندی ظاہر کردی ہے اور وہ سال میں تیس دن پاکستان آکر اکیڈمی اور پاکستان اے کرکٹ ٹیم کی کوچنگ میں اپنا کردار اداکرینگے۔

رمیز راجہ نے کہا کہ ضرورت پڑنے پر پاکستان کرکٹ ٹیم کے لئے بھی ان کے وسیع تجربے سے استفادہ کیا جائے گا۔

تاہم انہوں نے یہ واضح کردیا ہے کہ جاوید میانداد بدستور پاکستان کرکٹ ٹیم کے کوچ کی ذمہ داری نبھاتے رہیں گے۔

پاکستان کرکٹ بورڈ کے چیف ایگزیکٹیو نے کہا کہ وہ گریگ چیپل کے مشورے سے ان کی پاکستان آمد کا شیڈول تیار کررہے ہیں وہ وقفے وقفے سے پاکستان آتے رہیں گے۔

پچپن سالہ گریگ چیپل آسٹریلوی کرکٹ کی تاریخ کے چند کامیاب بیٹسمینوں اور کپتانوں میں شمار ہوتے ہیں انہوں نے اپنے ٹیسٹ کریئر کا آغاز اور اختتام سنچری سے کیا۔ انہوں نے87 ٹیسٹ میچز میں24 سنچریوں کی مدد سے7110 رنز اسکور کئے۔