فخر زمان کے شاندار 193 رنز رائیگاں، جنوبی افریقہ نے سیریز برابر کر دی

دوسرے ایک روزہ میچ میں جنوبی افریقہ نے پاکستان کو 17 رنز سے شکست دے دی ہے۔ پاکستان اور جنوبی افریقہ کے درمیان آج جوہانسبرگ میں ایک روزہ سیریز کا دوسرا میچ کھیلا گیا، جہاں پاکستان نے ٹاس جیت کر پہلے فیلڈنگ کا فیصلہ کیا۔

جنوبی افریقہ نے پہلے کھیلتے ہوئے پاکستان کو جیت کے لیے 342 رنز کا ہدف دیا۔

پاکستان نے نو وکٹ کے نقصان پر 50 اوورز میں 324 رنز بنائے۔ فخر زمان نے جنوبی افریقہ کے باؤلرز کا آخری اوور تک خوب مقابلہ کیا اور وہ آخری اوور کی پہلی بال پر دوسرا رن مکمل کرتے ہوئے باؤنڈری سے ڈائرکٹ تھرو پر رن آؤٹ ہو گئے۔ فخرزمان نے 193 رنز بنائے۔

آج امام الحق آؤٹ ہونے والے پہلے بلے باز تھے جنھوں نے پانچ رنز بنائے۔ وہ لنگی نگدی کی گیند پر کیچ آؤٹ ہوئے۔ بابر اعظم 31 رنز بنا سکے جبکہ محمد رضوان بغیر کوئی رن بنائے پویلین لوٹے تو ان کے کچھ دیر بعد دانش عزیز نو رنز بنا کر آؤٹ ہو گئے۔ ان تینوں کو اینرک نورکیہ نے آؤٹ کیا۔

شاداب خان آؤٹ ہونے والے پانچویں بیٹسمین تھے جو تبریز شمسی کی گیند پر ایل بی ڈبلیو آؤٹ ہو گئے۔

شاداب کے بعد آصف علی نے فخر زمان کا کچھ دیر کے لیے ساتھ دیا اور 19 رنز بنائے۔ وہ آندیلے پھیلکوائیو کی گیند پر کیچ پکڑا بیٹھے۔ آؤٹ ہونے والے آٹھویں کھلاڑی شاہین آفریدی تھے۔

جنوبی افریقہ کے اینرک نورکیہ سب سے کامیاب باؤلر ثابت ہوئے انھوں نے نہ صرف بابر اعظم، محمد رضوان اور دانش عزیز کو یکے بعد دیگرے پویلین کی راہ دکھائی اور پاکستانی بیٹسمینوں کو دفاعی انداز اختیار کرنے پر مجبور کیے رکھا۔

میچ کا تفصیلی سکور کارڈ

جنوبی افریقہ کی اننگز کا احوال

بات کی جائے اگر جنوبی افریقہ کی اننگز کی تو آج جنوبی افریقہ نے محتاط انداز میں اننگز کا آغاز کیا اور چھ کھلاڑیوں کے نقصان پر 341 رنز بنائے۔

جنوبی افریقہ کی جانب سے ایڈن مکرم اور کوئنٹن ڈی کاک نے اننگز کا آغاز کیا۔

دونوں بلے بازوں نے محتاط انداز میں کھیل شروع کیا۔ آؤٹ ہونے والے پہلے کھلاڑی ایڈن مکرم تھے جنھوں نے 39 رنز بنائے اور فہیم اشرف کی گیند پر کیچ آؤٹ ہوئے۔

اس کے بعد کوئنٹن ڈی کاک اور تیمپا باوہما نے ذمہ دارانہ بلے بازی کرتے ہوئے 114 رنز کی شراکت کی۔ کوئنٹن ڈی کاک 80 رنز بنا کر حارث رؤف کی گیند پر بولڈ ہو گئے۔

ڈیوڈ ملر نے اننگز کی آخری بال پر اپنی نصف سنچری بھی مکمل کی۔ آج کے میچ میں تیمپا باوہما 92 رنز پر آؤٹ ہو گئے۔

دونوں ٹیموں نے گذشتہ میچ میں کھیلنے والے گیارہ کھلاڑی آج میدان میں اتارے ہیں اور کوئی تبدیلی نہیں کی۔

آج کے میچ کی ایک دلچسپ بات یہ ہے کہ جنوبی افریقہ کی ٹیم گلابی رنگ کے کپڑے پہننے ہوئی تھی جس کا مقصد چھاتی کے سرطان کے بارے میں آگاہی بڑھانا تھا۔

جنوبی افریقہ کی اس جیت سے تین میچز کی سیریز ایک ایک سے برابر ہو گئی ہے۔

اس سے قبل سنچوریئن میں کھیلے گئے پہلے ایک روزہ میچ میں پاکستان نے جنوبی افریقہ کو ایک سنسی خیز مقابلے کے بعد آخری اوور کی آخری گیند پر شکست دے دی تھی۔

اُس میچ میں جنوبی افریقہ نے پہلے کھیلتے ہوئے پاکستان کو 274 رنز کا ہدف دیا تھا جو پاکستان نے میچ کی آخری بال پر سات وکٹوں کے نقصان پر حاصل کیا۔ جنوبی افریقہ نے 50 اوورز کے اختتام پر چھ وکٹوں کے نقصان پر 273 رنز بنائے تھے۔ پہلے میچ میں پاکستان کی طرف سے بابر اعظم نے سنچری سکور کی تھی۔

سوشل میڈیا پر رد عمل

پاکستان اور جنوبی افریقہ کے درمیان آج دوسرا میچ بھی سوشل میڈیا پر شائقین کی توجہ کا مرکز بنا رہا۔ جہاں آج دونوں ٹیموں پر تبصرے کیے جارہے تھے وہیں دوسری اننگز کے آغاز سے لے کر اختتام تک فخر زمان موضوع بحث بنے رہے۔

وقفے وقفے سے پاکستان کے تجربہ کار کھلاڑی ان کا ساتھ چھوڑتے گئے مگر انھوں نے ہمت نہیں ہاری۔ فخر زمان کبھی دفاعی انداز اختیار کرتے نظر آئے تو کبھی جارحانہ انداز اختیار کرتے۔ وہ آج کا میچ اس طرح کھیل رہے تھے کہ جیسے خود انھوں نے اکیلے ہی ہدف حاصل کرنا ہے۔ اور کچھ ہوا بھی یوں کہ جب تک وہ کریز پر رہے جنوبی افریقہ کی ٹیم کے لیے کسی بڑے چیلنج سے کم نہیں رہے۔

اس صورتحال پر ایک صارف نے کچھ یوں تبصرہ کیا۔

کسی نے فخر کو اپنا فخر قرار دیا ہے تو کسی نے ماضی میں جھانک کر سعید انور کی اننگز یاد دلائی۔

انھوں نے اس وقت سعید انور کے احساسات کا خیالی منظر کچھ اس انداز میں کھینچا ہے۔

’ایکسکیوز میں، برادر۔۔۔ برادر ادھر‘

سوشل میڈیا پر صارفین نے فخر زمان کے رن آؤٹ ہونے پر جنوبی افریقہ کے وکٹ کیپر ڈی کاک کی طرف سے پہلے فخر زمان کو ’مس لیڈ‘ کرنے اور پھر اس کے بعد مسکرانے کی خوب خبر لی اور اس طرح کے رویے کو سپورٹس مین سپرٹ کی ہی خلاف ورزی قرار دیا۔

خیال رہے کہ ڈی کاک نے فیلڈر کی طرف رخ کر کے دوسرے اینڈ پر تھرو کرنے کا کہا جس سے فخر زمان نے رک کر پیچھے دیکھا اور پھر اسی اثنا میں فیلڈر کا تھرو سیدھا ان کے سٹمپ پر آ کر لگا جس سے وہ رن آؤٹ ہو گئے۔

ایک صارف نے فخر زمان کے ماضی کو مدنظر رکھ کر کچھ یوں تبصرہ کیا: 'ویل پلیڈ لیفٹیننٹ فخر زمان، ون مین آرمی'

خیال رہے کہ فخر زمان پاکستان نیوی کا حصہ رہے اور انھیں اس حوالے سے اعزازی لیفٹینٹٹ کا عہدہ بھی دے رکھا ہے۔