انڈیا 2019 کا عالمی کپ جیتنے کے لیے فیورٹ ہے: سچن تندولکر
،تصویر کا ذریعہGetty Images
انڈیا کے مایہ ناز بلے باز سچن تندولکر کا خیال ہے کہ ان کا ملک تیسری بار سنہ 2019 کا عالمی کرکٹ کپ جیتنے کے لیے فیورٹ ہے۔
تندولکر کا یہ بیان ان کے سابق ساتھی راہول ڈراوڈ کے بیان کے دو روز بعد سامنے آیا جس میں انھوں نے کہا تھا کہ ویراٹ کوہلی کی ٹیم انڈیا کے لیے تیسرا ورلڈ کپ جیتنے کی اہل ہے۔
کرکٹ کی دنیا میں سب سے زیادہ رنز بنانے والے انڈین کھلاڑی سچن تندولکر نے اتوار کو خبر رساں ادارے پی ٹی آئی کو بتایا ’جہاں تک ہمارے امکانات ہیں، مجھے یہ کہنے میں کوئی حرج نہیں کہ ہم ورلڈ کپ جیتنے کے لیے فیورٹ ہیں۔‘
ان کا مزید کہنا تھا ’میں ریکارڈ پر کہہ رہا ہوں کہ ہم ٹیم میں بہترین توازن رکھتے ہیں جہاں ہم دنیا کے کسی بھی حصے اور کسی بھی سطح پر مقابلہ کریں گے۔‘
تندولکر کا خیال ہے کہ انگلینڈ انڈیا کو سخت ترین چیلنج دے گا جبکہ انڈیا کے خلاف کھیلی جانے والی ہوم سیریز 4-1 سے ہارنے کے باوجود نیوزی لینڈ کی ٹیم کی کارکردگی بھی دیکھنے کے لائق ہو گی۔
تندولکر کے بقول ’میں جانتا ہوں کہ نیوزی لینڈ نے انڈیا کے خلاف کھیلی جانے والے حالیہ سیریز میں جدوجہد کی ہے لیکن یہ اچھا یونٹ ہے اور ان کے خلاف کھیلنے والی کسی بھی ٹیم کو سخت محنت کرنی پڑتی ہے۔‘
’یہ سب جلد مومنٹم حاصل کرنے پر ہے۔ میرے رائے کے مطابق انگلینڈ اس ایونٹ میں سب سے سخت ترین حریف ہو گا جبکہ نیوزی لینڈ ڈارک ہارس ہو گا۔‘
واضح رہے کہ انڈیا کی ٹیم گذشتہ ایک سال کے دوران ایک روزہ میچوں میں کامیاب رہی ہے۔
End of سب سے زیادہ پڑھی جانے والی
جنوبی افریقہ کو ایک روزہ میچوں کی سیریز میں 1-5 سے ہرانے کے بعد اگرچہ انڈیا انگلینڈ کے خلاف 1-2سے ہارا تاہم اس نے دوبارہ مومنٹم حاصل کیا اور ایشیا کپ جیتنے کے علاوہ آسٹریلیا کو 1-2 سے شکست دی اور اب نیوزی لینڈ کو ہرایا۔
تندولکر کا کہنا تھا کہ سیٹون سمتھ اور ڈیوڈ وارنر کی ٹیم میں واپسی کے بعد آسٹریلیا ایک مختلف ٹیم ہو گی۔
انڈیا کے بلے باز کے بقول ’مجھے لگتا ہے کہ سمتھ اور وارنر کی ٹیم میں واپسی اور ان کے دیگر بولروں کے ایک روزہ سکواڈ میں آنے سے آسٹریلیا ایک مضبوط اور سخت ٹیم ہو گی۔
خیال رہے کہ انڈیا سنہ 1983 اور 2011 میں کرکٹ کا عالمی کپ جیت چکا ہے۔
کرکٹ کے عالمی کپ 2019 کا آغاز رواں برس 30 مئی سے ہو گا۔
