فیس بک پر ’ڈس لائیک‘ کا بٹن جلد: زکربرگ

سماجی رابطوں کی ویب سائٹ فیس بک پر اب ناپسندیدہ پوسٹ پر رائے کا اظہار ممکن ہو سکے گا۔

فیس بک کے بانی مارک زکربرگ نے کیلیفورنیا میں فیس بک کے صدر دفتر میں پریس کانفرنس کے دوران بتایاکہ ناپسندیدگی کا اظہار کرنے کے لیے بٹن جلد دستیاب ہو گا۔

ان کا کہنا تھا کہ وہ ’ڈس لائیک‘ کے بٹن کو تجرباتی طور پر متعارف کروانے کے بہت قریب ہیں۔

فیس بک پر پسندیدگی کا اظہار کرنے کے لیے تو لائیک کا بٹن موجود ہے تاہم ناپسندیدگی کا اظہار کسی نشان کے ذریعے کرنا ممکن نہیں۔

مارک زکربرگ کے مطابق اب تک ڈس لائیک بٹن کے لیے سینکڑوں افراد ان سے مطالبہ کر چکے ہیں۔

ان کا کہنا تھا کہ آج کا دن بہت اہم ہے کیونکہ وہ حقیقتاً یہ کہنے کے قابل ہو چکے ہیں کہ ’ہم اس پر کام کر رہے ہیں، اور اس کا تجربہ کرنے کے بہت قریب ہیں۔‘

تاہم انھوں نے یہ بھی کہا کہ وہ نہیں چاہتے کہ اس طریقۂ کار سے لوگ دوسروں کی پوسٹس کو ڈاؤن کریں۔اس کے بجائے یہ اس وقت ہو گا جب لوگ کسی اداس کرنے والی پوسٹ پر لائیک کرتے ہوئے اپنے آپ کو غیر حساس محسوس کرتے ہیں۔

سماجی رابطوں کی ماہر پروفیسر اینڈریا فورٹ کہتی ہیں کہ اس بٹن کو لوگ کسی پوسٹ سے اتفاق نہ کرنے کی صورت میں استعمال کر سکتے ہیں یا اس کے ذریعے کسی افسوس ناک واقعے جیسے موت یا نقصان کے بارے میں ڈالی جانے والی پوسٹ پر اپنی رائے کا اظہار کر سکتے ہیں۔