84 سالہ طالبعلم کے لیے گوگل کا اعزاز

گوگل نے کینیا میں پرائمری سکول میں داخلہ لینے والے دنیا کے سب سے معمر ترین شخص کے اعزاز میں ڈوڈل (کارٹون) بنایا ہے۔

یہ ڈوڈل 84 سالہ کیمانی مورگ کی سکول میں داخلہ لینے کی 11 ویں سالگرہ پر بنایا گیا ہے اور گوگل کینیا کے ہوم پیج پر دیکھا جا سکتا ہے۔

کیمانی مورگ جن کا 2009 میں انتقال ہوگیا تھاآ انھوں سکول میں داخلہ لیتے وقت کہا تھا کہ وہ حساب اور پڑھنا سیکھنا چاہتے ہیں تاکہ وہ مسیحی مذہبی کتاب کا مطالعہ کرسکیں۔

گوگل کا کہنا ہے کہ یہ ڈوڈل اس بات کی یاد دہانی کراتا ہے کہ آپ کسی بھی عمر میں نیا فن سیکھ سکتے ہیں۔

جنگِ آزادی میں حصہ لینے والے کیمانی مورگ کا 2004 میں سکول میں داخلہ لینا ان کے لیے وجہِ شہرت بنا تھا۔

مشرقی افریقہ میں گوگل کی کمیونیکیشنز مینیجر ڈوروتی اوکی کا کہنا ہے کہ ’ کیمانی ایک غیر معمولی انسان تھے، ان کی تعلیم حاصل کرنے کی چاہت عمر کے کسی بھی حصے میں نئی چیزیں سیکھنے کے لیے پوری دنیا کے لیے ایک مشعلِ راہ ہے۔‘

ان کا مزید کہنا تھا کہ ’ڈوڈل مشہور سائنسدانوں، فنکاروں، اور بانیوں کے اعزاز میں بنائے جاتے ہیں، کیمانی مورگ نے کسی بھی عمر میں علم حاصل کرنے جیسے اہم موضوع کو اجاگر کیا، گوگل ان کے اعزاز میں ڈوڈل بنانے پر بہت پر جوش ہے۔‘

اگرچہ اپنی عمر ثابت کرنے کے لیے ان کے پاس کوئی کاغذات تو نہیں تھے لیکن کہا جاتا ہے کہ’ کپکیندی یو‘ نامی سکول میں داخلے کے وقت ان کی عمر 84 سال تھی۔

خیال رہے کہ ان کے دو پوتے بھی اسی سکول میں تعلیم حاصل کر رہے تھے۔

گنیز بک آف ریکارڈز کے مطابق کیمانی پرائمری سکول میں داخلہ لینے والے دنیا کے معمر ترین انسان ہیں۔