لچک دار سمارٹ فون کی نمائش اگلے ماہ
سمارٹ فون بنانے والی کمپنی سام سنگ الیکٹرونکس لچک دار ڈسپلے والے سمارٹ فون بنانے کا منصوبہ بنا رہی ہے۔
اس منصوبے کا اعلان کمپنی نے سیول میں ہونے والی گلیکسی نوٹ تھری کی لانچ کے موقع پر کیا۔
سام سنگ کے موبائل کی سٹریٹیجک مارکیٹنگ کے سربراہ ڈی جے لی کا کہنا تھا کہ ’ہم اکتوبر میں جنوبی کوریا میں ایک ایسا سمارٹ فون متعارف کروائیں گے جس کا ڈسپلے لچک دار ہوگا۔‘
انہوں نے اس بارے میں مزید معلومات نہیں دیں۔
ڈیجیٹل ڈسپلے ٹیکنالوجی اب لچک دار اور خم دار سکرینز کی جانب بڑھ رہی ہے۔
جنوری میں سام سنگ نے ایسی مصنوعات کے نمونے دکھائے تھے جن کی سکرین نہ صرف خم دار ہے بلکہ انہیں بڑا بھی کیا جا سکتا ہے۔ لیکن ابھی یہ واضح نہیں کہ کیا اس قسم کی ٹیکنالوجی کو بڑے پیمانے پر کم لاگت میں بنانا ممکن ہوگا بھی یا نہیں۔
ایک ریسرچ کمپنی سی سی ایس انسائٹ میں تجزیہ کار بین ووڈ کا کہنا ہے کہ ’لچک دار سکرین سے صارف کا سمارٹ فون استعمال کرنے کا تجربہ مکمل طور پر بدل نہیں جائے گا لیکن ایسا کرنے سے سام سنگ فونز کی ایک ایسی وسیع مارکیٹ میں اپنا مختلف مقام بنا پائے گا جہاں زیادہ تر فون مُستطیل شکل والے اور فلیٹ سکرین ہیں۔‘
سام سانگ اور اس کی کوریائی حریف ایل جی الیکٹرونکس لچک دار ڈسپلے والے ٹی وی پہلے ہی سے بنا رہے ہیں۔
End of سب سے زیادہ پڑھی جانے والی
سام سنگ پہننے والی ٹیکنالوجی کی جانب بھی بڑھ رہا ہے جس کی ایک مثال حال ہی میں متعارف کروائی گئی کلائی پر پہننے والی گھڑی گلیکسی گیئر ہے جس میں فون بھی ہے۔
سمارٹ فونز اب سب سے زیادہ بکنے والے فونز ہیں اور سی سی ایس انسائٹ کے مطابق 2013 میں فروخت ہونے والے کل1.7 ارب فونز میں سے ایک ارب سمارٹ فون ہوں گے۔
