Wednesday, 24 August, 2005, 12:18 GMT 17:18 PST

برطانیہ بدر کرنے کے نئے قوائد

برطانیہ نے نئے قوائد کا اعلان کر دیا ہے جن کے تحت ملک میں تحریر یا تقریر کے ذریعے دہشت گردی کی حوصلہ افزائی کرنے، اس کو جائز قرار دینے یا نفرت اور اشتعال انگیز تقریریں کرنے پر غیر ملکیوں کو برطانیہ سے نکالا جا سکے گا۔

برطانوی وزیر داخلہ چارلس کلارک نے اس طرز عمل اور ان کارروائیوں کی ایک فہرست بدھ کو جاری کی ہے جس میں ملوث ہونے پر برطانیہ میں مقیم غیر ملکی باشندوں کو ملک سے نکالا جا سکے گا۔

چارلس کلارک نے کہا کہ برطانیہ میں سات جولائی کے حملوں کے بعد ’کھیل کے ضابطے بدل گئے ہیں۔‘

ان تفصیلات کی روشنی میں وزراء کو مشتبہ اور دہشت گردی میں ملوث غیر ملکیوں کو ملک سے باہر نکالنے کی بنیاد مل جائے گی۔

اس سلسلے میں دنیا بھر میں ان افراد کے بارے میں ایک بحث کا آغاز کیا جارہا ہے جنہوں نے ان رویوں کا مظاہرہ کیا ہے۔

یہ اقدام لندن میں سات جولائی کوہونے والے بم دھماکوں کے بعد سکیورٹی کے سلسلے میں اٹھائے جانے والے اقدامات کا حصہ ہیں۔

برطانوی حکومت نے اس بارے میں دو ہفتوں سے طویل مشاورت کا سلسلہ بھی شروع کیا ہوا تھا۔

برطانوی حکومت نے اس سلسلے میں دیگر حکومتوں سے کہا ہے کہ بے دخل کیے جانے والوں افراد سے برا سلوک نہ کیا جائے۔