سابق ریاستی وزیر ہلاک

بھارت کے زیرانتظام کشمیر میں پولیس کا کہنا ہے کہ جنوبی اننت ناگ ضلع میں مشتبہ عسکریت پسندوں نے ریاست کے ایک سابقہ جونئیر وزیر صفدر بیگ کو گولی مار کر ہلاک کردیا۔

صفدر بیگ ریاست میں حزب اختلاف کی جماعت نیشنل کانگریس کے رہنما تھے جنہیں جمعرات کی سہ پہر ان کے گھر کے باہر گولی ماری گئی تھی اور وہ ہسپتال جاتے ہوۓ ہلاک ہوگۓ تھے۔

صفدر بیگ ریاستی سیاست میں تیس سال سے زیادہ سے سرگرم تھے اور انیس سو چھیاسٹھ میں ریاستی اسمبلی کے رکن منتخب ہوۓ تھے اور ریاستی حکومت میں جونئیر وزیر بناۓ گۓ۔

صفدر بیگ کا ایک محافظ بھی اس حملہ میں شدید زخمی ہوگیا۔ ابھی تک کسی عسکریت پسند گروہ نے اس حملہ کی ذمہ داری قبول نہیں کی۔

دوسری طرف ہندوستان کے زیر انتطام دورہ پر گۓ برطانیہ کے جنرل اسٹاف کے چیف جنرل سر مائک جیکسن نے کہا ہے کہ کشمیر میں جاری عسکریت پسندی سے صرف فوجی طریقوں سے نہیں نپٹا جاسکتا۔

بھارت کے زیرانتظام کشمیر کے دورہ کے موقع پر بات چیت کرتے ہوۓ انہوں نے کہا کہ اس صورتحال کا تقاضا ہے کہ سیاسی اور معاشی اقدامات بھی لیے جائیں۔

جنرل جیکسن نے برطانوی حکومت کی اس تجویز کو دہرایا کہ کشمیر بھارت اور پاکستان کے درمیان ایک دوطرفہ معاملہ ہے۔ توقع کی جارہی ہے کہ برطانیہ اور ہندوستان اگلے سال مشترکہ فوجی مشقیں کریں گے۔