۔

فریڈم الائنس کو پارلیمان کی دو سو پچیس نشستوں میں سے ایک سو پانچ نشستیں حاصل ہوئی ہیں۔

اس لئے اب مخلوط حکومت بنانے کے لئے کم نشستیں حاصل کرنے والی جماعتوں سے مذاکرات جاری ہیں۔

عام انتخابات کے حتمی نتائج کے اعلان سے پہلے چیف الیکشن کمشنر اتوار کو سیاسی جماعتوں کے سربراہان سے ملاقات کرنے والے ہیں جس میں وہ انتخابات میں ہونے والی بے قاعدگیوں کے بارے میں لگائے جانے والے الزامات کا جائزہ لیں گے۔

الیکشن کمیشن نے انتخابات میں دھاندلیوں اور طاقت کے استعمال کے الزامات کے پیش نظر تیس سیٹوں کے نتائج کو اتوار تک کے لیے روک لیا تھا۔

کولمبو سے بی بی سی کے نامہ نگار کا کہنا ہے کہ سری لنکا کے لیےجو کافی عرصہ سے سیاسی عدم استحکام کا شکار رہا ہے ایک اور مخلوط حکومت کی خبر شاید کوئی خوش آئند خبر نہیں ہو گی۔

صدر چندریکا کمارتنگا کی جماعت نے اعلان کیا ہے کہ آئندہ حکومت وہ تشکیل دے گی۔ چندریکا کمارتنگا کی جماعت کے انتخابی اتحاد نے سینتالیس فیصد ووٹ حاصل کئے ہیں۔

صدر چندریکا کمارتنگا نے حکومت کی آئینی مدت ختم ہونے سے چار سال پہلے ہی عام انتخابات کا اعلان وزیر اعظم رنیل وکرماسنگھے سے تامل باغیوں سے ہونے والے امن مذاکرات پر پیدا ہونے والے اختلافات کی بنیاد پر کیا تھا۔

چندریکا کمارتنگا کی جماعت کے ایک ترجمان نے اے ایف پی کو بتایا کہ ان کی جماعت اکثرتی جماعت کے طور پر سامنے آ رہی ہے اور آئندہ حکومت بھی وہ ہیں تشکیل دے گی۔

بی بی سی کے نامہ نگار کا کہنا ہے کہ کمارتنگا کی جیت سے ظاہر ہوتا ہے کہ وکرماسنگھے کی جماعت کے خلاف صدر کی طرف سے لگائے جانے والے الزامات کو عوامی تائید حاصل ہے۔

بہت سے لوگوں کا کہنا ہے کہ دو سال سے امن مذاکرات چل رہے تھے لیکن اس کا کوئی نتیجہ سامنے نہیں آیا جب کہ دوسری طرف مہنگائی میں روز بروز اضافہ ہوتا چلا جا رہا ہے۔