ایڈز میں اضافے کی تیز تر رفتار

بتایا گیا ہے کہ جاری سال میں ایڈز سے متاثر ہونے والوں کی تعداد میں ریکارڈ تیزی سے اضافہ ہوا ہے۔

اقوام متحدہ کا ادارہ برائے ایڈز اور عالمی ادارہ برائے صحت دونوں کے مطابق ایڈز کا شکار بننے والے نئے لوگوں کی تعداد پچاس لاکھ تک پہنچ گئی ہے۔

ایڈز کے انسداد کے لیے کام کرنے والے اقوام متحدہ کے ادارے کے سربراہ پیٹر پیاوٹ کا کہنا ہے کہ اس وقت اس بیماری کے انسداد کے لیے جو کوششیں کی جا رہی ہیں وہ اس کے پھیلاؤ کی رفتار کے سامنے انتہائی ناکافی ہیں۔

اعداد شمار کے مطابق ایڈز کا نشانہ بننے والوں کی تعداد میں روزانہ چودہ ہزار نئے لوگوں کا اضافہ ہو رہا ہے۔

تاہم ان اداروں نے متنبہ کیا ہے کہ آنے والے برسوں میں یہ تعداد خاص طور پر مشرقی یورپ اور وسطی ایشیا میں وبا کی شکل اختیار کر سکتی ہے۔

یکم دسمبر کو ایڈز کے عالمی دن سے پہلے جاری کی جانے والی اس رپورٹ میں کہا گیا ہے کہ اس وقت دنیا بھر میں ایڈز سے متاثرہ افراد کی تعداد چار کروڑ ہے جن میں شامل بچوں کی تعداد پچیس لاکھ ہے۔

ایڈز کے انسداد کے لیے کام کرنے والے حکام کا کہنا ہے کہ اس سال جاری کیے جانے والے اعداد شمار ماضی کے مقابلے میں زیادہ قابلِ اعتماد ہیں کیونکہ اب اعداد و شمار جمع کرنے کے طریقے زیادہ بہتر ہو چکے ہیں۔