چین کے چڑیا گھر میں شیرکو گولی ماری گئی
،تصویر کا ذریعہGetty
چین کے ایک چڑیا گھر میں ایک شیر کو اپنے رکھوالے کو مارنے اور اپنے احاطے سے بھاگنے کی وجہ سے گولی مار کر ہلاک کر دیا گیا ہے۔
یہ واقعہ اتوار کو چین کی مشرقی ریاست شانڈونگ کے ٹائیان ٹائگر ماؤنٹین پارک میں پیش آیا۔
حکام کا کہنا ہے کہ جب شیر کے احاطے کی صفائی کرنے والے 65 سالہ ملازم صفائی کررہے تھے تو شیر نے اس کے شانے کو دبوچ لیا جو بعد میں زخموں کی تاب نہ لا سکے۔
اس حملے کے بعد شیر چڑیا گھر میں پولیس کی گولی سے ہلاک ہونے سے قبل تقریباً ایک گھنٹے تک کھلا گھومتا رہا۔
چینی میڈیا میں یہ بات نہیں بتائی گئی ہے کہ حملے کے بعد شیر اپنے باڑے سے نکلنے میں کس طرح کامیاب ہوا۔
حکام نے پارک کے دروازے پر سٹیل کی رکاوٹیں کھڑی کردیں جبکہ چڑیا گھر کے سٹاف اور صبح کو سوئمنگ کے لیے آنے والے افراد کو چڑیا گھر کے باہر کر دیا گيا۔
بیجنگ یوتھ ڈیلی اخبار کے مطابق پولیس کے ایک ترجمان نے کہا کہ انھوں نے مقامی پولیس اور سپیشل ٹاسک فورس بلا لی تھی۔
،تصویر کا ذریعہXINHUA
انھوں نے کہا کہ وہ شیر کو ایک دیوار تک پہنچانے میں کامیاب رہے اور پھر پارک میں آنے والے لوگوں کی حفاظت کے مد نظر اسے گولی مار دی گئی۔
End of سب سے زیادہ پڑھی جانے والی
اخبار کے ایک رپورٹر نے بتایا کہ مقامی وقت کے مطابق صبح آٹھ بجے کے بعد انھوں نے ایک گولی چلنے کی آواز سنی پھر دس منٹ بعد ’گولیوں کی مسلسل آوازیں آتی رہیں۔‘
پارک کو دوپہر کے بعد لوگوں کے لیے پھر سے کھول دیا گيا۔ اس واقعہ پر چین کے سوشل نٹ ورک پر بحث و مباحثہ جاری ہے۔ بہت سے افراد کا خیال ہے کہ کیا شیر کا ہلاک کیا جانا ضروری تھا جبکہ بعض لوگوں نے چڑیا گھر میں خراب حفاظتی انتظامات کو تنقید کا نشانہ بنایا ہے۔
ایک شخص نے ویئیبو پر لکھا: ’انسان شیروں کی تندی و تیزی کو پسند کرتے ہیں لیکن اس کی وجہ سے ان کی آزادی کھو گئی ہے، انھیں بھوکا اور خراب حالات میں رکھا جاتا ہے اور اب اس نے اپنی جان گنوا دی ہے۔‘
