مبشر زیدی بی بی سی اردو ڈاٹ کام، اسلام آباد

	ملبے سے تین افراد کو زندہ نکالا جا چکا ہے

بچے اور ماں کو تباہ شدہ ٹاور کے ملبے سے پاکستانی وقت کے مطابق نصف شب کے قریب نکالا گیا۔ اس موقع پر غیر ملکی ماہرین اور پاکستانی امدادی کارکن بھی موجود تھے جنہوں نےماں اور بیٹے کو فوری طبی امداد کے لیے متعلق افراد کے ساتھ کر دیا۔

پیر کو پاکستان اور برطانوی امدادی کارکنوں نے اس ملبے سے چھ افراد کی لاشیں نکالیں۔ مارگلہ ٹاورز میں قائم پولیس انفارمیشن سینٹر کے مطابق اب تک ستائیس افراد کی لاشیں اس عمارت سے نکالی جا چکی ہیں جبکہ اکیاسی افراد کو زخمی حالت میں اس ملبے سے نکالا جا چکا ہے۔ حکام کے مطابق ابھی بھی ملبے میں پچاس لاشیں موجود ہیں۔

اس سے قبل برطانوی امدادی ادارے ریپڈ کے ٹیم لیڈر جان ہالینڈ نے بی بی سی سے بات کرتے ہوئے بتایا کہ کل سے تین افراد کو زندہ نکالا جا چکا ہے جبکہ ایک خاتون کی نشاندہی ہوئی ہے کہ وہ ملبے میں کہیں بہت نیچے زندہ حالت میں دبی ہوئی ہے۔

انہوں نے کہا کہ وہ امید کرتے ہیں کہ شاید اس عمارت میں مزید زندہ بچ جانے والے لوگ ہوں مگر ان کا کہنا تھا کہ وہ ابھی تک صرف ایک ہی زندہ فرد کی نشاندہی کر پائے ہیں۔ اس سوال پر کہ وہ اب تک کتنی لاشیں نکال چکے ہیں، جان ہالینڈ کا کہنا تھا کہ وہ صرف زندہ لوگوں کو تلاش کر رہے ہیں۔

امدادی کاروائی کی پاکستانی ٹیم کے رکن کیپٹن رضوان کا کہنا ہے کہ ابھی مارگلہ ٹاورز کے ملبے میں اندازاً پچاس کے قریب لاشیں موجود ہیں۔ انہوں نے بتایا کہ ملبے کو کاٹنے کا کام ایک زندہ فرد کو بچانے کی امید پر کیا جا رہا ہے۔