 |  بس ستر فٹ کی اونچائی سے گر کر بری طرح تباہ ہوگئی |
پولیس کے مطابق اسلام آباد کے قریب بس کے حادثے میں کم سے کم چالیس افراد ہلاک اور کئی زخمی ہوگئے ہیں۔ یہ بس مقامی وقت کے مطابق صبح چھ بجے کے قریب اسلام آباد ہائی وے پر کلر سیداں گاؤں سے اسلام آباد آ رہی تھی کہ تیز رفتاری کے سبب ایک ٹرالر سے ٹکرا گئی اور الٹ کر دریائے سواں میں جاگری۔ دریائے سواں میں ان دنوں پانی کی سطح بہت کم ہے اور بیشتر علاقہ خشک ہی پڑا ہے۔ حادثہ کاک نامی پل پر پیش آیا۔ اس پل کی اونچائی ستّر فٹ ہے اور اسلام آباد سے پندرہ میل دور واقع ہے۔ حادثے کے بعد ملبے سے لاشیں نکالنے اور زخمیوں کو طبی امداد فراہم کرنے کی امدادی کارروائیاں شروع کردی گئیں۔ متاثرین کو اسلام آباد اور راولپنڈی کے قریبی ہسپتالوں میں لے جایا گیا ہے۔ |  جائے حادثہ پر افسردہ خواتین |
پولیس حادثے کی تحقیقات کررہی ہے۔ اس سے قبل چھ جون کو ایبٹ آباد کے قریب ایک ٹرک اپنا توازن کھو بیٹھا اور ایک گڑھے میں جاگرا۔ اس حادثے میں بھی چالیس افراد ہلاک اور چھ زخمی ہوئے تھے۔ کچھ اطلاعات میں ہلاک شدگان کی تعداد چالیس بتائی جارہی ہے۔ | 
یہ صفحہ دوست کو ای میل کیجیئے
پرِنٹ کریں
