عدنان عادل
بی بی سی اردو ڈاٹ کام، لاہور |  |
|  پاکستان سنسر بورڈ نے یہ نہیں بتایا کہ ان فلموں کی نمائش پر پابندی کیوں لگائی گئی |
آج لاہور ہائی کورٹ کو بتایا گیا کہ وفاقی سنسر بورڈ نے پچھلے دس سالوں میں بورڈ نے سنسر کے لیے پیش کی جانے والی دو ہزار پانچ سو تیئس فلموں میں سے اننچاس فلموں کو ملک میں نمائش کے لیےممنوع قرار دیا۔ یہ بات سنسر بورڈ نے آج ایک آئینی رٹ کے جواب میں بتائی جو سنہ انیس سو اٹھانوے میں لاہور کے ایک وکیل ایم ڈی طاہر نے عدالت عالیہ نے دائر کی تھی۔ اس رٹ درخواست میں کہا گیا تھا کہ پاکستان ایک اسلامی ملک ہے اور انیس سو اکیانوے کے شریعت ایکٹ کے برعکس ملک میں عریانی اور فحاشی ہے اورعورتیں پردہ کے بغیر گھومتی پھرتی ہیں۔ اس آئینی درخواست میں عدالت عالیہ سے درخواست کی گئی تھی کہ فلموں، ٹیلی وژن ڈراموں اور تشہیری مواد عورتوں کا دوپٹے کے بغیر آنا غیر اسلامی ہے اس لیے سنسر بورڈ کو عورتوں کی تشہیر روکنے کی ہدایت کی جائے اور عورتوں کے لیے پردہ لازمی قرار دیا جائے۔ اس آئینی درخواست میں وفاقی حکومت، پنجاب حکومت، وفاقی سنسر بورڈ اور ٹیلی وژن کے ڈائریکٹر کو فریق بنایا گیا ہے۔ آج سنسر بورڈ او وفاقی حکومت نے اس کا جواب عدالت عالیہ میں پیش کیا جب کہ دوسرے فریق پہلے ہی جواب داخل کراچکے ہیں۔ |  پاکستان میں کچھ سیاسی گروہ فحاشی کو بہانہ بنا کر احتجاج کرتے ہیں |
آج فلم سنسر بورڈ نے اپنے جواب میں کہا کہ بورڈ وفاقی حکومت کے دیے ہوئے سنسر کوڈ کے مطابق اپنے فرائض انجام دے رہا ہے اور جہاں تک چوراہوں پر فلموں کے پوسٹر لگائے جانے کا تعلق ہے تو وہ بورڈ کے دائرہ اختیار میں نہیں ہے بلکہ صوبائی حکومت سے تعلق رکھتا ہے۔ وفاقی حکومت نے اپنے جواب میں کہا ہے کہ پاکستان ٹیلی وژن کے ڈراموں میں کسی طرح کی فحاشی کی اجازت نہیں دی جاتی اور اس ضمن میں ایک سخت سنسر کا نظام ہے جس کے تحت تمام ڈراموں، فلموں اور نجی کمپنیوں کے ڈراموں کا جائزہ لیا جاتا ہے۔ وفاقی حکومت کے مطابق ٹی وی کے مرکز میں ایک کمیٹی ہے جو سینئر افسروں پر مشتمل ہے جو تمام پروگراموں کا سنسر کوڈ کے مطابق جائزہ لیتی ہے اور ایک سند جاری کرتی ہے کہ اس پروگرام میں کوئی قابل اعتراض چیز نہیں ہے۔ وفاقی حکومت نے عدالت عالیہ سے کہا ہے کہ یہ درست نہیں ہے کہ ٹی وی ڈرامے جرائم کی شرح میں اضافہ کا سبب بنتے ہیں کیونکہ ٹی وی کی پالیسی ہے کہ جرائم دکھانے والے ڈرامے جرم اورمجرم کو شاندار بنا کر پیش نہ کریں بلکہ یہ دکھائیں کہ جرم کا نتیجہ اچھا نہیں ہوتا اور قانون بالادست ہوتا ہے اورمجرم کو ہمیشہ سزا ملتی ہے۔ |  فحاشی کہاں سے شروع ہوتی ہے اور کہاں ختم ہوتی ہے، اس کا کسی کے پاس کوئی جواب نہیں ہے |
سنسر بورڈ اور وفاقی حکومت نے عدالت عالیہ سے درخواست کی ہے کہ یہ درخواست قانون کے خلاف ہے اس لیے اسے مسترد کیا جائے۔ درخواست گزار وکیل ایم ڈی طاہر نے کہا کہ وہ ایک ہفتہ میں اپنا جواب دائر کریں گے اس کے بعد اس درخواست کی اگلی سماعت کا فیصلہ ہوگا۔ | 
یہ صفحہ دوست کو ای میل کیجیئے
پرِنٹ کریں
