کراچی میں نامعلوم افراد کی فائرنگ سے چینی شہری ہلاک

کراچی کے علاقے کلفٹن میں نامعلوم افراد کی فائرنگ سے ایک چینی شہری ہلاک اور ایک راہ گیر زخمی ہو گیا ہے۔

نامہ نگار ریاض سہیل کے مطابق پولیس کا کہنا ہے کہ یہ واقعہ پیر کی دوپہر زمزمہ کے علاقے میں پیش آیا جب موٹر سائیکل سوار مسلح افراد نے ایک سفید کار پر فائرنگ کی۔

یہ بھی پڑھیے

’لاشیں ملنے تک ہلاکتوں کی تصدیق نہیں کر سکتے‘

ڈی آئی جی جنوبی آزاد خان نے مقامی میڈیا سے بات کرتے ہوئے شبہ ظاہر کیا ہے کہ واقعہ ٹارگٹ کلنگ کا نتیجہ ہو سکتا ہے۔

فائرنگ کے نتیجے میں چینی شہری چانگ زو اور ایک راہ گیر زخمی ہوا جنھیں جناح ہپستال منتقل کیا گیا۔

جناح ہسپتال کی شعبۂ حادثات کی انچارج ڈاکٹر سیمی جمالی نے بی بی سی کو بتایا کہ چینی شہری کے سر میں گولی لگی تھی اور ابتدائی طور پر اسے وینٹی لیٹر پر رکھا گیا تاہم وہ کچھ دیر بعد دم توڑ گیا۔

ان کا کہنا تھا کہ راہ گیر کو ٹانگ میں گولی لگی تھی اور اس کی حالت بہتر ہے۔

پولیس کو جائے وقوعہ سے گولیوں کے نو خول ملے ہیں۔ ڈی آئی جی آزاد خان نے بتایا کہ چینی شہری کو پولیس سکیورٹی فراہم کی گئی تھی لیکن واقعے کے وقت اہلکار ان کے ساتھ موجود نہیں تھے۔

یاد رہے کہ چین پاکستان اقتصادی راہداری سے متعلق منصوبوں کے سلسلے میں چینی شہریوں کی ایک بڑی تعداد کراچی میں مقیم ہے اور حکومتِ سندھ نے سی پیک منصوبے میں شامل چینی شہریوں کی حفاظت کے لیے ایک علیحدہ فورس بھی بنا رکھی ہے۔

گذشتہ دنوں وزیر قانون ضیا الحسن لنجار کا ایک بیان بھی سامنے آیا تھا جس میں ان کا کہنا تھا کہ وفاقی حکومت نے چینی شہریوں کی تعداد کے بارے میں صوبائی حکومت کو آگاہ نہیں کیا ہے اور نہ ہی کوئی تفصیلات شیئر کی ہیں۔