آپ اس وقت اس ویب سائٹ کا ٹیکسٹ پر مبنی ورژن دیکھ رہے ہیں جو کم ڈیٹا استعمال کرتا ہے۔ مرکزی ویب سائٹ جہاں تمام تصاویر اور ویڈیوز موجود ہیں دیکھیے
’لندن میں پی آئی اے کے طیارے سے منشیات برآمد‘
- مصنف, طاہر عمران
- عہدہ, بی بی سی اردو ڈاٹ کام
برطانیہ کی نیشنل کرائم ایجنسی نے اس بات کی تصدیق کی ہے کہ پاکستان کی قومی فضائی کمپنی پی آئی اے کے طیارے سے پیر کی رات لندن ہیتھرو ہوائی اڈے پر ہیروئین برآمد ہوئی تھی۔
نیشنل کرائم ایجنسی کی طرف سے بی بی سی کو بھجوائے گئے ایک بیان میں اس بات کی تصدیق کی گئی ہے کہ ’بارڈر فورس کی جانب سے پیر 15 مئی کو ہیتھرو کے ہوائی اڈے پر پاکستان سے آنے والی ایک پرواز سے ہیروئین ضبط کیے جانے کے معاملے کی تحقیقات کی جا رہی ہیں۔‘
ایجنسی نے بیان میں مزید کہا کہ اس حوالے سے کوئی بھی گرفتاری عمل میں نہیں آئی اور تفتیش جاری ہے۔
دوسری جانب پی آئی اے کے ترجمان مشہود تاجور کا کہنا ہے کہ پی آئی اے کی پرواز پی کے 785 پر سکیورٹی ایجنسی کی جانب سے تلاشی کے عمل کے بعد پی آئی اے کو نہ تو زبانی اور نہ ہی تحریری طور پر طیارے میں منشیات کی موجودگی کے بارے میں آگاہ کیا گیا ہے۔
انھوں نے مزید کہا کہ اسلام آباد سے لندن پہنچنے والی پرواز کے عملے کو روکا گیا تھا جن کو بعد میں ہوٹل جانے کی اجازت دی گئی۔ مگر منگل کی رات کو عملے کو پاسپورٹس کی واپسی کا عمل شروع کر دیا گیا ہے اور عملہ بدھ کو پاکستان آنے والی پرواز پر خدمات سرانجام دے گا۔
اس سے قبل پی آئی اے کے مختلف ذرائع نے نام نہ بتانے کی شرط پر بتایا کہ 'پولیس نے طیارے کی تلاشی لی۔ ان کے پاس معلومات تھیں جن کی بنیاد پر انھوں نے آتے ہی طیارے کے مخصوص حصوں کی تلاشی لی۔'
End of سب سے زیادہ پڑھی جانے والی
بی بی سی کو ملنے والی تصاویر میں واضح طور پر دیکھا جا سکتا ہے حکام نے طیارے کے مختلف حصے کھول کر اس کی تلاشی لی اور پی آئی اے کے ذرائع کے مطابق اسے ادھیڑ کر رکھ دیا۔
پی آئی اے کی پرواز پی کے 785 پیر کو اسلام آباد سے لندن پہنچی تھی جس کو 758 کے طور پر واپس لندن سے لاہور جانا تھا مگر تلاشی میں تاخیر کی وجہ سے پرواز دیر سے روانہ ہوئی۔
پی آئی اے کے اہکار کے مطابق پولیس نے عملے سے بھی پوچھ گچھ کی ہے۔
اہلکار کا کہنا تھا کہ سکیورٹی حکام نے مختلف چیزوں کو کھول کر دیکھا اور ان کے انداز سے لگ رہا تھا کہ انھیں کسی نے مخصوص جگہوں کے بارے میں بتایا ہے جس کی سکیورٹی اور انسدادِ منشیات کے عملے کو تلاش ہے۔
تلاشی کے لیے روکا جانے والا طیارہ پی آئی اے کا بوئنگ 777-240 ای آر ہے اور اس سے قبل بھی جب یہ طیارہ کراچی میں معمول کی مرمت کے لیے ہینگر میں کھڑا تھا تو پی آئی اے ہی کے انسدادِ منشیات کے عمے نے اس کے بعض حصوں می چھپائی گئی منشیات کی نشاندہی کی تھی جسے بعد میں برآمد کیا گیا۔