اعجاز مہر بی بی سی اردو ڈاٹ کام، اسلام آْباد

ایڈوانی 1979 میں بطور بھارتی وزیرِ اطلاعات پاکستان آئے تھے

پاکستان حکومت کی دعوت پر وہ پیر کی رات صحافیوں اور پارٹی رہنماؤں کے چالیس رکنی وفد کے ہمراہ وہ لاہور پہنچے اور رات کو ہی اسلام آباد آگئے۔

بھارت کی حزب مخالف کی بڑی جماعت کے صدر پاکستان کے صدر جنرل پرویز مشرف کے علاوہ دیگر حکام سے بھی ملاقات کریں گے۔

جب ایل کے ایڈوانی پاکستان میں ہوں گے ان ہی دنوں یعنی دو جون کو بھارت کے زیرانتظام کشمیر کے حریت کانفرنس کے کچھ رہنما بھی پاکستان آئیں گے۔

پاکستان کے شہر کراچی میں سن انیس چوبیس کو پیدا ہونے والے ایڈوانی کی مادری زبان سندھی ہے اور وہ تقسیم ہند سے قبل صوبہ سندھ کے شہر حیدرآباد میں خاصا وقت گزار چکے ہیں۔

پاکستان آمد سے قبل وہ بھارت کے وزیراعظم منموہن سنگھ سے بھی ملے تھے تاکہ دونوں ممالک میں جاری مذاکرات میں مختلف اختلافی معاملات پر وہ اپنے ملک کی حکومت کا نکتہ نظر جان سکیں۔

ایل کے ایڈوانی دوسری بار پاکستان کا دورہ کر رہے ہیں۔ پہلی بار آج سے پچیس برس سے بھی زیادہ عرصہ قبل پاکستان بطور وزیر اطلاعات آئے تھے۔

پاکستان میں جناب ایڈوانی کو ایک قدامت پسند ہندو رہنما سمجھا جاتا ہے اور بعض تجزیہ نگار کہتے ہیں کہ بھارت کے ساتھ جاری مذاکرات کے نتیجے میں کوئی بھی پائیدار حل اس وقت ہی ممکن ہوسکتا ہے جب حزب اختلاف کی بڑی جماعت بی جے پی اور اس کے قدامت پسند ہندو سوچ رکھنے والے تسلیم کریں گے۔

پاکستان آنے سے قبل بے جی پی کے رہنما نے کہا تھا کہ انکے اس دورے سے دونوں ملکوں کےدرمیان جاری عوامی رابطے کی مہم کو مزید فروغ ملےگا۔

پاکستان کے ساتھ مذاکرات کا عمل بی جے پی نے اپنے اقتدار میں اس وقت شروع کیا تھا جب ان کے وزیراعظم اٹل بہاری واجپئی تھے۔

اس جماعت کے شروع کردہ عمل کو بھارت میں آنے والی کانگریس کی حکومت نے بھی جاری رکھا اور اس بارے میں خود ایل کے ایڈوانی نے اس بات پر خوشی ظاہر کی تھی کہ وزیراعظم منموہن سنگھ نے مسٹر واجپئی کے مشن کو جاری رکھا ہے۔

چند برس قبل جب پاکستان اور بھارت کے درمیان حالات کشیدہ تھے تو پاکستان کے اخبارات میں یہ خبریں بھی شایع ہوئیں تھیں کہ ایل کے ایڈوانی حکومت پاکستان کو حیدرآباد میں ان کے خلاف داخل ایک مقدمے میں مطلوب ہیں۔
لیکن اب جب حالات نے پلٹا کھایا ہے تو حکومت کی جانب سے اس آدھی صدی پرانے مقدمے کی بازگشت بھی ختم ہوگئی ہے۔

پاکستان کے صدر پرویز مشرف جب گزشتہ اپریل میں ہندوستان دورے پر گئے تھے تو انہوں نے مسٹر ایڈوانی کو تحفے میں انکے سکول کا سرٹیفکٹ اور کچھ یادگار تصویریں دی تھیں ۔