عراق میں امریکی گارڈوں نے ملک کے جنوب میں واقع ایک جیل میں چار عراقی قیدیوں کو گولیاں مار کر ہلاک کر دیا ہے۔ امریکی فوج کے مطابق ام قصر کے قریب کیمپ بکا جیل میں قیدیوں کی حسب معمول تلاشی کے دوران ہنگامہ آرائی ہو گئی اور قیدیوں نے فوجیوں پر پتھر اور دیگر اشیا پھینکنا شروع کر دیں جس سے چھ افراد زخمی ہو گئے۔ امریکی فوج کا کہنا ہےکہ تشدد پر قابو پانے کے دوسرے طریقے ناکام ہوجانے کے بعد فوجیوں نے فائرنگ شروع کر دی۔ فوج کے مطابق ہنگامہ آرائی پینتالیس منٹ تک جاری رہی۔ دریں اثناء بغداد کے جنوب سڑک کے کنارے ایک حملے میں تین امریکی فوجی ہلاک ہو گئے۔ انٹرنیٹ پر نشر کیے گئے ایک پیغام میں جسے عراق میں القاعدہ کے حامیوں سے منسوب کیا جا رہا ہے کہا گیا ہے کہ امریکہ کے خلاف جدو جہد جاری رہے گی۔ اس بیان میں اتوار کو ہونے والے انتخابات کو امریکی شعبدہ بازی کہا گیا ہے۔ | 
یہ صفحہ دوست کو ای میل کیجیئے
پرِنٹ کریں
