Wednesday, 01 February, 2006, 17:07 GMT 22:07 PST

ایران کےمسئلے کا سفارتی حل چاہیے

بھارت کے وزیر اعظم منموہن سنگھ نے امید ظاہر کی ہے کہ ایران کے جوہری پروگرام کا تنازعہ بات چیت کے ذریعے حل ہو جائے گا اور اسے سلامتی کونسل میں بھیجنے کی ضرورت پیش نہیں آئے گی۔

منموہن سنگھ نے یہ واضح نہیں کیا کہ اگر ایران کا معاملہ سلامتی کونسل میں اٹھایا گیا تو بھارت کا موقف کیا ہوگا۔ انہوں نے کہا کہ وہ اس مسئلہ پر قومی مفاد کو سامنے رکھتے ہوئے غور کریں گے۔

بھارت میں امریکہ کے سفیر ڈیوڈ ملفورڈ پر گزشتہ ہفتے اس بیان کے بعد سخت تنقید کی گئی تھی کہ اگر بھارت نے ایران کے معاملے میں امریکہ کی حمایت نہ کی تو اس کو امریکہ سے جوہری ٹیکنالوجی کی منتقلی کا منصوبہ کھٹائی میں پڑ جائےگا۔

ملفورڈ نے کہا تھا کہ ان کے بیان کو سیاق و سباق سے ہٹ کر شائع کیا گیا تھا۔

امریکی محکمۂ خارجہ نے کہا تھا کہ ملفورڈ محض امریکی کانگریس میں ایران کے ’متنازعہ‘ جوہری پروگرام کے بارے میں پائے جانے والے شدید جذبات کی عکاسی کر رہے تھے۔