بھارت کے نئے وزیر خارجہ نٹور سنگھ

انہوں نے کہا کہ بھارت اپنے تمام پڑوسیوں کے ساتھ بہتر تعلقات چاہتا ہے اور انیس سو بہتر کے شملہ معاہدہ کے تحت پاکستان کے ساتھ بات چیت کرنے کو تیار ہے۔ وزیر خارجہ نے یہ بات اپنی آبائی ریاست راجستھان کے دورے کے دوران پریس کو دیئے گئے ایک بیان میں کہی۔

نٹور سنگھ نے کہاکہ پاکستان کے ساتھ تعلقات کی بنیاد شملہ معاہدہ ہوگا۔ بھارت دونوں ملکوں کے درمیان اعتماد بحال کرنے کے لئے کوششیں تیز کرے گا اور تمام مسائل بشمول کشمیر پر بات چیت کرنے کو تیار ہے۔

شملہ معاہدہ انیس سو بہتر میں اس وقت کے وزراء اعظم اندراگاندھی اور ذوالفقار علی بھٹو کے درمیان ہوا تھا۔

اس معاہدہ میں اس بات پر اتفاق کیا گیا تھا کہ دونوں ممالک بیرونی مدد کے بغیر اپنے باہمی معاملات طے کرنے کی کوشش کریں گے۔ لیکن پچھلے کچھ عرصے میں پاکستان یہ دلیل دیتے ہوئے امریکہ اور مغربی ممالک کو دونوں ملکوں کے درمیان ثالثی کے لئے کہتا رہا ہے کہ دونوں ممالک آپس میں اتفاق رائے نہیں کر سکے۔

وزیر داخلہ نے کہا کہ دونوں ممالک کو تجارت، قونصل خانے کھولنے اور کھیلوں کے بہتر تعلقات کے لئے بات چیت کرنا چاہیے۔

انہوں نے کہا کہ بھارت، ایران گیس پائپ لائن کو جو پاکستنان سے گزرتی ہے مکمل کرنے کی کو شش کرے گا کیونکہ اس سے نہ صرف بھارت بلکہ ایران اور پاکستان کو بھی فائدہ ہو گا۔