رام مندر تعمیر ہوگا: اڈوانی

بھارت کے نائب وزیِراعظم ایل کے اڈوانی نے ایک انتخابی تقریر میں وعدہ کیا ہے کہ ایودھیا میں متنازعہ مقام پر رام مندر بنے گا۔لال کرشن اڈوانی متنازعہ مقام پر بی جے پی حامیوں سے خطاب کر رہے تھے جو ہندو اور مسلمان دونوں ہی کے لئے مقدس سمجھا جاتا ہے ۔

1992 میں ہندو قوم پرستوں کی جانب سے بابری مسجد کے انہدام کے بعد ملک بھر میں فسادات بھڑک اٹھے تھے جس میں ہزاروں افراد ہلاک ہوئے تھے۔

اڈوانی نے انتخابی ریلی سے خطاب کرتے ہوئے کہا کہ بھارت کے سماج میں اس طرح کی تبدیلیاں آئی ہیں کہ انہیں یقین ہے کہ اب بغیر کسی تلخی یا تنازعہ کے رام مندر کی تعمیر ممکن ہو سکے گی۔

ایشیا ٹوڈے پر بی بی سی کے ساتھ ایک انٹرویو میں انہوں نے یہ تسلیم کیا کہ اس مسلئے کی وجہ سے انہیں سیاسی نقصان اٹھانا پڑا ہے ۔بابری مسجد کے انہدام کے وقت اڈوانی ایودھیا میں موجود تھے۔