కోవిడ్ ద్వేషానికి ట్రంప్ బీజాలు వేశారా... అమెరికాలో ఆసియా వారిపై దాడులు ఎందుకు పెరుగుతున్నాయి?

ఇటీవలే ఒక థాయ్‌లాండ్ సంతతికి చెందిన మహిళను కొందరు వ్యక్తులు కింద పడేయడంతో ఆమె చనిపోయారు. ఒక ఫిలిప్పీన్స్ సంతతి మహిళపై బాక్స్ కట్టర్‌తో దాడి జరగ్గా, ఆమె తీవ్రంగా గాయపడ్డారు. ఓ చైనీయురాలినైతే కొందరు తీవ్రంగా కొట్టి నిప్పు కూడా అంటించారు.

ఇటీవలి కాలంలో అమెరికాలోని ఆసియా సంతతి వారిపై జరుగుతున్న దాడులకు ఈ సంఘటనలు నిదర్శనం.

ఏషియన్ అమెరికన్‌లతో గొడవ పడటం, దూషించడం, భౌతిక దాడులకు దిగడం లాంటి ఘటనలపై వేలకొద్దీ ఫిర్యాదులు పోలీసులకు అందుతున్నాయి.

కోవిడ్-19 వ్యాప్తికి వారే కారణమన్న ఆరోపణలతో వీరిపై దాడులు జరుగుతున్నాయని బాధితుల తరఫు న్యాయవాదులు, ఉద్యమాకారులు ఆరోపిస్తున్నారు.

అమెరికాలో అసలేం జరుగుతోంది?

ఆసియా సంతతి ప్రజలపై దాడులు జరిగే అవకాశం ఉందని కోవిడ్ వ్యాప్తి మొదలైన రోజుల్లోనే ఎఫ్‌బీఐ హెచ్చరించింది.

2020 సంవత్సరానికి సంబంధించిన హేట్ క్రైమ్ డేటా ఇంకా విడుదల కాలేదు. కానీ, 2019 సంవత్సరపు గణాంకాలను పరిశీలిస్తే, గత దశాబ్ధకాలంలో ఎన్నడూ లేనంతగా ఆ సంవత్సరంలో దాడులు జరిగినట్లు తేలింది.

అమెరికాలో నివసిస్తున్న ఏషియన్ అమెరికన్లపై దాడులు ప్రమాదకర స్థాయికి చేరుకున్నాయని ఐక్యరాజ్య సమితి ఒక నివేదికలో పేర్కొంది.

అయితే, కచ్చితంగా ఎన్నిదాడులు జరిగాయి అన్నది మాత్రం స్పష్టంగా తెలిసే అవకాశం లేదు. పైగా నేరాలను రికార్డు చేసే విధానం అమెరికాలో ఒక్కో ప్రాంతంలో ఒక్కో రకంగా ఉంది.

స్టాప్ ఆసియన్ అమెరికన్, పసిఫిక్ ఐలాండర్స్ హేట్ (Stop AAPI Hate) అనే స్వచ్ఛంద సంస్థకు అందిన ఫిర్యాదుల ప్రకారం గత ఏడాది సుమారు 2800 పైగా ఘటనలు జరిగినట్లుగా తేలింది.

ఈ గ్రూప్ ఏషియన్లపై జరిగే దాడులకు సంబంధించి ఒక సెల్ఫ్ రిపోర్టింగ్ టూల్‌ను మెయింటెన్ చేస్తోంది.

2020 సంవత్సరంలో 27 సంఘటనలు తమ దృష్టికి వచ్చినట్లు న్యూయార్క్ సిటీ హేట్ క్రైమ్స్ టాస్క్ ఫోర్స్ వెల్లడించింది. గత సంవత్సరంతో పోలిస్తే ఇది తొమ్మిది రెట్లు పెరిగినట్లు తేలింది.

ఓక్‌లాండ్, కాలిఫోర్నియా ప్రాంతాలలోని చైనా టౌన్లలో కమండ్ పోస్ట్‌లు ఏర్పాటు చేసినట్లు పోలీసులు తెలిపారు.

సెలబ్రిటీలు, ఇన్‌ఫ్లుయెన్సర్లు ఇటీవలి కాలంలో జరిగిన దాడులకు సంబంధించిన పలు వీడియోలను సోషల్ మీడియాలో పోస్ట్ చేశారు.

అందులో కొన్ని దాడుల వివరాలు ఇవి:

కాలిఫోర్నియాలో పరిస్థితి ఎలా ఉంది?

తాజా గణాంకాల ప్రకారం కాలిఫోర్నియా రాష్ట్రంలో 60 లక్షలమంది ఏషియన్ అమెరికన్లు నివసిస్తున్నారు. ఆ రాష్ట్ర జనాభాలో 15శాతానికి పైగా వీరే ఉంటారు.

అమెరికాలో ముందుగా కరోనా వైరస్ బయటపడిన ప్రాంతాలలో కాలిఫోర్నియా ఒకటి. వైరస్ కారణంగా ఇక్కడి బిజినెస్‌లన్నీ నిలిచి పోయాయి. సుమారు 50,000 మంది మరణించారు.

2020 మార్చి నుంచి మే నెల మధ్య కాలంలో ఒక్క కాలిఫోర్నియా రాష్ట్రంలోనే 800 పైగా కోవిడ్ సంబంధించిన విద్వేష దాడులు జరిగినట్లు పోలీసు రికార్డులు చెబుతున్నాయి.

చర్యలు ఎలా ఉన్నాయి?

ఆరెంజ్ కౌంటీలో యాంటీ ఏషియన్ దాడులు ఎక్కువయ్యాయని, గతంతో పోలిస్తే ఇక్కడ 1200 శాతం దాడులు పెరిగాయని ‘సెంటర్ ఫర్ ది స్టడీ ఆఫ్ హేట్ అండ్ ఎక్స్‌ట్రీమిజం‘ అనే స్వచ్ఛంద సంస్థ వెల్లడించింది.

అమెరికాలో పెరిగిపోతున్న యాంటీ ఏషియన్ సెంటిమెంట్ ‌కు ఈ దాడులు నిదర్శనమని ఏషియన్ అమెరికన్ న్యాయవాదులు అంటున్నారు.

ఈ ద్వేషం ట్రంప్ కారణంగానే పెరిగిందని, అప్పట్లో చైనా వైరస్ అని, కుంగ్ ఫ్లూ అని ట్రంప్ కామెంట్లు చేసేవారని మరి కొందరు గుర్తు చేస్తున్నారు.

ప్రస్తుతం అధికార మార్పిడి జరగడంతో ఏషియన్లపై దాడులకు సంబంధించిన కఠిన నిర్ణయాలు తీసుకుంటున్నారు. ఈ తరహా దాడులకు వ్యతిరేకంగా అమెరికా సెనేట్ ఒక చట్టాన్ని చేసింది.

ఇలాంటి ఘటనలపై ఫిర్యాదులను పరిశీలించేందుకు ఒక అధికారిని నియమిస్తారు.

ఇవి కూడా చదవండి:

(బీబీసీ తెలుగును ఫేస్‌బుక్, ఇన్‌స్టాగ్రామ్‌, ట్విటర్‌లో ఫాలో అవ్వండి. యూట్యూబ్‌లో సబ్‌స్క్రైబ్ చేయండి.)