డిజిటల్ హెల్త్ కార్డ్: మోదీ ప్రభుత్వం తీసుకొచ్చిన ఈ కార్డుతో ప్రయోజనాలు ఏమిటి? నష్టాలు ఉన్నాయా

ఆయుష్మాన్ భారత్ డిజిటల్ మిషన్ (ఏబీడీఎం)ను ప్రధాన మంత్రి నరేంద్ర మోదీ సోమవారం ప్రారంభించారు. దీనిలో భాగంగా భారత పౌరులకు ఒక ప్రత్యేకమైన డిజిటల్ హెల్త్ ఐడీని ఇస్తారు.

ఈ డిజిటల్ హెల్త్ కార్డు సాయంతో ప్రజల ఆరోగ్య సమాచారాన్ని డిజిటల్ రూపంలో ఒకచోట స్టోర్ చేసుకోవచ్చు.

ఈ ఐడీ సాయంతో సదరు వ్యక్తిని పీడిస్తున్న వ్యాధులు, చికిత్సలతోపాటు వైద్య పరీక్షల సమాచారాన్ని కూడా డిజిటల్ రూపంలో సేవ్ చేసుకోవచ్చు.

ఆరోగ్య రంగంలో ఈ మిషన్‌ను విప్లవాత్మక మార్పుగా ప్రధాన మంత్రి నరేంద్ర మోదీ అభివర్ణించారు.

‘‘ఏడేళ్లుగా దేశంలోని ఆరోగ్య సదుపాయాలు మెరుగుపడుతూ వస్తున్నాయి. తాజా మిషన్‌ ఆ దిశగా పడిన ఒక విప్లవాత్మక మార్పులాంటిది’’అని ప్రధాన మంత్రి నరేంద్ర మోదీ అన్నారు.

‘‘ఆయుష్మాన్ డిజిటల్ భారత్ మిషన్‌తో ప్రజల ఆరోగ్య పరిరక్షణ తేలిక అవుతుంది. ఆసుపత్రుల్లో పనులు కూడా వేగంగా జరుగుతాయి. ప్రస్తుతం టెక్నాలజీ అనేది కొన్ని ఆసుపత్రులకు మాత్రమే పరిమితమైంది. తాజా మిషన్‌తో దేశ వ్యాప్తంగా అన్ని ఆసుపత్రులకూ టెక్నాలజీ చేరువ అవుతుంది. ఆసుపత్రులు ఒకదానితో మరొకటి అనుసంధానం అవుతాయి. ప్రజలందరికీ ప్రత్యేకమైన డిజిటల్ ఐడీ ఇస్తాం. దీని సాయంతో ఆరోగ్య వివరాలను జాగ్రత్తగా భద్రపరచుకోవచ్చు’’అని ప్రధాన మంత్రి మోదీ వివరించారు.

ఏమిటీ కార్డు?

ఈ డిజిటల్ హెల్త్ కార్డు కూడా ఆధార్ లాంటిదే. ఈ కార్డు జారీ ప్రక్రియల్లో భాగంగా అందరికీ 14 డిజిట్ల హెల్త్ ఐడీ ఇస్తారు. ఇది ఆసుపత్రుల్లో ఒక గుర్తింపు కార్డులా పనిచేస్తుంది.

దీని సాయంతో రోగి అనారోగ్యాలు, చికిత్సలు సహా ఇతర ఆరోగ్య సమాచారాన్ని వైద్యులు సులువుగా తెలుసుకోవచ్చు.

ఇది ఆరోగ్య ఖాతా లాంటిది. దీనిలో ఆరోగ్య సమాచారం మొత్తం స్టోర్ చేసుకోవచ్చు. ఇదివరకు ఏ వ్యాధికి చికిత్స తీసుకున్నారు? ఏ ఆసుపత్రిలో ఈ చికిత్స జరిగింది? ఏ పరీక్షలు చేశారు? ఏ మందులు ఇచ్చారు? ఏదైనా ఆరోగ్య పథకం కింద వ్యక్తి లబ్ధి పొందుతున్నారా? తదితర అన్ని వివరాలూ ఈ హెల్త్ ఐడీలో ఉంటాయి.

ఈ కార్డును పొందడం ఎలా?

డేటా ఎలా స్టోర్ చేస్తారు?

డిజిటల్ హెల్త్ మిషన్‌లో భాగంగా హాస్పిటల్స్, క్లినిక్స్, వైద్యులను ఒక సెంట్రల్ సర్వర్‌తో అనుసంధానిస్తారు. దీని కోసం హాస్పిటళ్లు, వైద్యులు రిజిస్టర్ చేసుకోవాల్సి ఉంటుంది. ఈ సర్వర్‌లోనే రోగుల ఆరోగ్య సమాచారాన్ని కూడా పొందుపరుస్తారు.

‘‘ఎన్‌డీహెమ్ హెల్త్ రికార్డ్స్’’ యాప్‌ సాయంతో ఆరోగ్య వివరాలు ఎప్పటికప్పుడు నమోదు చేసుకునే వీలుంది. డిజిటల్ హెల్త్ ఐడీ లేదా లాగిన్ ఐడీ-పాస్‌వర్డ్‌ సాయంతో ఈ యాప్‌లో లాగిన్ అవ్వొచ్చు.

ఈ యాప్‌లో మనం చికిత్స తీసుకుంటున్న ఆసుపత్రిని శోధించి, గుర్తించాల్సి ఉంటుంది. ఈ యాప్ సాయంతో మన ఆరోగ్య సమాచారం ఆసుపత్రిలోని వైద్యులు చూసేందుకు వీలుంటుంది.

సొంతంగా మనం కూడా మందుల చీటీ, పరీక్షల రిపోర్టులు, ఇతర సమాచారాన్ని యాప్‌లో యాడ్ చేయొచ్చు. ఈ యాప్‌కు లాకర్ సదుపాయం ఉంది.

మీరు అనుమతి ఇస్తేనే, ఆరోగ్య సిబ్బంది లేదా వైద్యులు మీ ఆరోగ్య సమాచారాన్ని చూడగలుగుతారు. ఇక్కడ మీ అనుమతి తప్పనిసరి.

ఈ సర్వర్‌లోని సమాచారాన్ని ఎప్పుడు కావాలంటే అప్పుడు డిలీట్ చేసుకునే వీలుంది.

ప్రయోజనాలు ఏమిటి?

డేటా సెక్యూరిటీ ఉంటుందా?

ఈ హెల్త్ కార్డ్‌లో డేటా మొత్తం డిజిటల్ రూపంలో సేకరిస్తారు. దీన్ని సెంట్రల్ సర్వర్‌లో స్టోర్ చేస్తారు. ఇక్కడ ప్రజల సమాచారానికి పటిష్ఠమైన భద్రత ఉంటుందని కేంద్ర ప్రభుత్వం చెబుతోంది.

అయితే, భద్రత విషయంలో సైబర్ నిపుణులు మాత్రం ఆందోళన వ్యక్తంచేస్తున్నారు. సరైన చర్యలు లేకపోతే, కొత్త సమస్యలు తలెత్తే ముప్పుందని వారు చెబుతున్నారు.

మన దగ్గర డాక్యుమెంట్లు ఉంటే మనం జాగ్రత్తగా చూసుకోగలం. అదే డాక్యుమెంట్లు కేంద్రం సర్వర్‌లో సేవ్ చేస్తే, భద్రత విషయంలో మనం పూర్తిగా కేంద్రంపైనే ఆధారపడాల్సి ఉంటుంది’’అని సైబర్ నిపుణుడు పవన్ దుగ్గల్ అన్నారు.

‘‘ఈ మిషన్‌తో చాలా విషయాలు తేలిక అవుతాయి. ఇది నిజమే అయితే, భద్రతా ముప్పులు.. ముఖ్యంగా సైబర్ సెక్యూరిటీ విషయంలో సందేహాలు వ్యక్తం అవుతున్నాయి.’’

‘‘ఆధార్‌లానే ఈ డేటా కూడా సురక్షితంగా ఉంటుందని కేంద్రం చెబుతోంది. అయితే, ఆధార్ డేటాలోకి హ్యాకర్లు చొరబడగలరని చాలా వార్తలే వచ్చాయి. దీంతో డిజిటల్ హెల్త్ డేటాకు కూడా అలాంటి ముప్పులు సంభవించే అవకాశముంది.’’

‘‘డేటా బ్రీచ్ అతిపెద్ద సవాల్. ముఖ్యంగా ఈ డేటా సైబర్ క్రిమినెల్స్ చేతిల్లోకి వెళ్తే చాలా ప్రమాదం. వారు దీన్ని తమకు కావాల్సిన విధంగా ఉపయోగించుకుంటారు. ఒక్కోసారి రోగికి అందాల్సిన చికిత్స కాకుండా వేరే చికిత్స అందించే ముప్పు కూడా డేటా బ్రీచ్‌లతో ఉంటుంది.’’

డేటా ప్రొటెక్షన్ లా లేదు..

‘‘డేటా ప్రొటెక్షన్ విషయంలో ప్రభుత్వం చాలా ప్రకటనలు చేస్తోంది. అయితే, సైబర్ సెక్యూరిటీకి ఎలాంటి చర్యలు తీసుకుంటారో స్పష్టంగా వెల్లడించడం లేదు’’అని పవన్ అన్నారు.

‘‘భారత్‌లో ఇప్పటివరకు డేటా ప్రొటెక్షన్ లా లేదు. 2019లో డేటా ప్రొటెక్షన్ బిల్లును తీకొచ్చారు. అయితే, అది జాయింట్ పార్లమెంటరీ కమిటీ దగ్గర ఉంది. అసలు చట్టమే లేనప్పుడు, ప్రజల డేటాను ఎలా పరిరక్షిస్తారు? ఒకవేళ చట్టం ఉంటే, దాని కంద శిక్షలు ఉంటాయి. ఫలితంగా చాలా మంది భయపడతారు. చట్టమే లేకపోతే ఎవరికి నచ్చినట్లు వారు ప్రవర్తిస్తారు.’’

అయితే, తమ అనుమతి ఉంటేనే వైద్యులు తమ డేటాను చూడగలరని నేషనల్ డిజిటల్ హెల్త్ మిషన్ తమ వెబ్‌సైట్లో రాసుకొచ్చింది. ఎంతకాలం ఆ డేటాను చూడొచ్చు? అనే విషయంలోనూ మనం ఆంక్షలు విధించొచ్చని పేర్కొంది.

అయినప్పటికీ, డేటా ప్రొటెక్షన్ విషయంలో ప్రశ్నలు, ఆందోళనలు వస్తూనే ఉన్నాయి.

ఇవి కూడా చదవండి:

(బీబీసీ తెలుగును ఫేస్‌బుక్, ఇన్‌స్టాగ్రామ్‌, ట్విటర్‌లో ఫాలో అవ్వండి. యూట్యూబ్‌లో సబ్‌స్క్రైబ్ చేయండి.)