కర్నూలు జిల్లా ఓర్వకల్లు వద్ద క్షిపణి పరీక్ష విజయవంతం... డీఆర్‌డీవోను ప్రశంసించిన రక్షణ మంత్రి రాజ్‌నాథ్ సింగ్

ఆంధ్రప్రదేశ్‌లో కర్నూలు జిల్లా ఓర్వకల్లు వద్ద రక్షణ పరిశోధన, అభివృద్ధి సంస్థ (డీఆర్‌డీవో) బుధవారం ఒక క్షిపణి పరీక్ష నిర్వహించింది.

'మ్యాన్ పోర్టబుల్ యాంటీ-ట్యాంక్ గైడెడ్ మిసెల్(ఎంపీఏటీజీఎం)' అనే ఈ క్షిపణి పరీక్షను విజయవంతంగా నిర్వహించారంటూ డీఆర్‌డీవోను రక్షణశాఖ మంత్రి రాజ్‌నాథ్ సింగ్ ప్రశంసించారు.

యుద్ధ ట్యాంకర్‌కు నమూనా లాంటి ఒక లక్ష్యంపై ఈ క్షిపణి 'టాప్ అటాక్ మోడ్'లో కచ్చితత్వంతో దాడి చేసి ధ్వంసం చేసిందని ఆయన ట్విటర్‌లో చెప్పారు. ఈ పరీక్ష లక్ష్యాలన్నీ అందుకున్నట్లు తెలిపారు.

భారత సైన్యానికి, డీఆర్‌డీవోకు ఈ విజయం ఎంతో ఉత్సాహాన్ని ఇస్తుందని మంత్రి వ్యాఖ్యానించారు.

స్వదేశీ పరిజ్ఞానంతో రూపొందించిన ఈ క్షిపణి బరువు తక్కువగా ఉంటుంది. పరీక్షలో ఇది దాదాపు రెండున్నర కిలోమీటర్ల దూరంలోని లక్ష్యాన్ని ఛేదించింది.

ఈ క్షిపణిని మనిషి తీసుకెళ్లగలిగే పోర్టబుల్ ట్రైపాడ్ లాంచర్ నుంచి ప్రయోగించినట్లు రాజ్‌నాథ్ తెలిపారు.

ఈ క్షిపణిని విజయవంతంగా పరీక్షించడం ఇది మూడోసారని రక్షణశాఖ తెలిపింది.

ఎంపీఏటీజీఎం మూడో తరం క్షిపణిని అభివృద్ధి చేసేందుకు ఈ పరీక్ష తోడ్పడుతుందని అధికారులను ఉటంకిస్తూ పీటీఐ తెలిపింది.

ఇవి కూడా చదవండి:

(బీబీసీ తెలుగును ఫేస్‌బుక్, ఇన్‌స్టాగ్రామ్‌, ట్విటర్‌లో ఫాలో అవ్వండి. యూట్యూబ్‌లో సబ్‌స్క్రైబ్ చేయండి.)