‘ట్రంప్‌తో వాణిజ్య యుద్ధంలో గెలుస్తాం’ కెనడాకు కాబోయే ప్రధాని మార్క్ కార్నీ ప్రతిజ్ఞ

కెనడా ప్రధాన మంత్రిగా జస్టిన్ ట్రూడో స్థానాన్ని భర్తీ చేసే రేసులో విజయం సాధించిన మార్క్ కార్నీ అమెరికా అధ్యక్షుడు డోనల్డ్ ట్రంప్‍‌పై వాణిజ్య యుద్ధంలో గెలుస్తామని ప్రతిజ్ఞ చేశారు.

జస్టిన్ ట్రూడో రాజీనామాతో ప్రధానిగా బాధ్యతలు స్వీకరించనున్న 59 ఏళ్ల కార్నీ తన ప్రసంగంలో ట్రంప్‌పై మాటల దాడి చేశారు. "కెనడాను అమెరికా 51వ రాష్ట్రంగా మార్చాలనుకుంటున్నారు. హాకీ ఆటలో గెలిచినట్టే వాణిజ్యంలోనూ కెనడానే గెలుస్తుంది. అమెరికన్లుదీనిపై ఎటువంటి సందేహాలు పెట్టుకోవాల్సిన పనిలేదు" అన్నారు.

ఎవరీ కార్నీ?

గతంలో కెనడా సెంట్రల్ బ్యాంక్, బ్యాంక్ ఆఫ్ ఇంగ్లాండ్‌కు గవర్నర్‌గా కార్నీ పని చేశారు. తాజాగా ఆయన లిబరల్ పార్టీ నాయకత్వ పోటీలో ముగ్గురు ప్రత్యర్థులను భారీ మెజారిటీతో ఓడించారు.

త్వరలో కార్నీ ప్రధానిగా ప్రమాణం చేసి, రాబోయే సార్వత్రిక ఎన్నికల్లో లిబరల్ పార్టీకి నాయకత్వం వహించనున్నారు.

పార్లమెంటులో మైనారిటీ ప్రభుత్వానికి నాయకత్వం వహించనున్న కార్నీ స్వయంగా ముందస్తు సార్వత్రిక ఎన్నికలు ప్రకటించవచ్చు, లేదా ప్రతిపక్షాలు అవిశ్వాస తీర్మానం ద్వారా ఎన్నికలకు పిలుపునివ్వొచ్చు.

అయితే కార్నీ ప్రత్యక్ష ఎన్నికల్లో ఎప్పుడూ పోటీ చేసి గెలవలేదు.

ఆదివారం జరిగిన పార్టీ నాయకత్వం ఎన్నికల్లో 85.9 శాతం ఓట్లతో, తన ప్రత్యర్థి, మాజీ ఆర్థిక మంత్రి క్రిస్టియా ఫ్రీలాండ్‌ను కార్నీ ఓడించారు.

దాదాపు దశాబ్దం పాటు లిబరల్ పార్టీ అధినేత పదవిలో ఉన్న ట్రూడో జనవరిలో రాజీనామా చేసిన తర్వాత ఈ నాయకత్వ పోటీ మెుదలైంది.

గృహనిర్మాణ సంక్షోభం,పెరుగుతున్న జీవన వ్యయంతో తీవ్ర నిరాశ చెందిన ఓటర్లలో ప్రజాదరణ కోల్పోయిన ట్రూడో, పార్టీలో అంతర్గత ఒత్తిడిని ఎదుర్కొన్నారు.

అమెరికా సుంకాలు అన్యాయం

కార్నీ తన విజయోత్సవ ప్రసంగంలో అమెరికాకు అతిపెద్ద వాణిజ్య భాగస్వామి అయిన కెనడాపై ట్రంప్ విధిస్తున్న సుంకాలు "అన్యాయమైనవి" అన్నారు.

గత మంగళవారం అమెరికా కెనడా వస్తువులపై 25% సుంకాలు విధించింది. కానీ రోజుల వ్యవధిలోనే ఆ ఆర్డర్ ను వెనక్కి తీసుకుంటూ కొన్ని వస్తువులకు ఉపశమనం కలిగించింది.

దేశ ఆర్థిక వ్యవస్థను కూల్చివేసేందుకు అమెరికా ప్రయత్నిస్తోందని ఆరోపిస్తూ, ట్రూడో ప్రతీకార సుంకాలతో స్పందించారు. కార్నీ తన విజయ ప్రసంగంలోఈ విషయాన్నే ప్రస్తావిస్తూ "ట్రంప్ కెనడియన్ కార్మికులు, కుటుంబాలు, వ్యాపారాలపై దాడి చేస్తున్నారు. ఆయన్ను ఈ విషయంలో గెలవనివ్వం " అన్నారు.

"అమెరికన్లు మాకు గౌరవం చూపించే వరకు" అమెరికా దిగుమతులపై సుంకాలను కెనడా కొనసాగిస్తుందని చెప్పారు.

కెనడా ఆర్థిక వ్యవస్థ అమెరికాతో వాణిజ్యంపై భారీగా ఆధారపడి ఉంది. ట్రంప్ బెదిరిస్తున్నట్టుగా పూర్తిగా భారీ సుంకాలు విధిస్తే కెనడా ఆర్థిక మాంద్యంలోకి పడే ప్రమాదం ఉంది.

"ఇవి మనకు చీకటి రోజులు. మనం ఇకపై ఎప్పటికీ నమ్మలేని దేశం ద్వారా మనకు ఈ చీకటి రోజులు వచ్చాయి" అని కార్నీ అన్నారు.

"మనం ఆ షాక్ నుంచి బయటపడుతున్నాం, కానీ పాఠాలను ఎప్పటికీ మర్చిపోకూడదు. మనల్ని మనం జాగ్రత్తగా చూసుకోవాలి. ఒకరినొకరు చూసుకోవాలి. రాబోయే కఠినమైన రోజుల్లో మనం కలిసి ముందుకు సాగాలి"

కార్నీ విధానాలు ఏంటి?

"సరిహద్దులను రక్షించుకుంటామని" కూడా కార్నీ ప్రతిజ్ఞ చేశారు. వలసదారులను, ఫెంటానిల్‌ను నియంత్రించడంలో కెనడా విఫలమైందని ఆరోపించిన ట్రంప్ చేసిన కీలక డిమాండ్ ఇది.

ఇటీవలి కాలంలో రాజకీయ అడ్డంకులు ఎదుర్కొన్న ప్రధాన ఇంధన ప్రాజెక్టుల పనులు మొదలుపెట్టడం కార్నీ చేస్తున్న ప్రధాన వాగ్దానాల్లో ఒకటి.

గృహనిర్మాణం, క్లీన్ ఎనర్జీ ప్రాజెక్టులలో పెట్టుబడులు పెడతామని, వాణిజ్యాన్ని సరళీకరిస్తామని, ఆర్థిక వ్యవస్థను అమెరికాపై ఆధారపడకుండా చేస్తామని కార్నీ హామీ ఇచ్చారు. నాయకత్వ పోటీ సమయంలో, కార్నీ ఫెడరల్ ప్రభుత్వ పరిమాణాన్ని పరిమితం చేస్తానని కూడా హామీ ఇచ్చారు.

(బీబీసీ కోసం కలెక్టివ్ న్యూస్‌రూమ్ ప్రచురణ)

(బీబీసీ తెలుగును వాట్సాప్‌,  ఫేస్‌బుక్, ఇన్‌స్టాగ్రామ్‌, ట్విటర్‌లో ఫాలో అవ్వండి. యూట్యూబ్‌లో సబ్‌స్క్రైబ్ చేయండి.)