பட்ஜெட் 2022: மக்களுக்கு பயனளிக்காத பட்ஜெட்டா இது? - ஓர் அலசல்

எந்த ஒரு தரப்பும் எதிர்தரப்பைக் குற்றம் சொல்ல முடியாத வகையில் அமைந்துள்ளது இந்த பட்ஜெட். உருவமற்ற பிரும்மத்தைப் போல. யாருக்கு இதை எப்படிப் பார்க்க விருப்பமோ அப்படிப் பார்த்துக்கொள்ளலாம். எந்த ஒரு சிறப்பம்சமும் இல்லை என்பது தான் இந்த பட்ஜெட்டின் சிறப்பம்சம்.

அதாவது இது ஒரு தலைப்புச் செய்தி இல்லை. கட்சி சார்புள்ளவர்களுக்கும் இது எளிதானது. அவர்கள் விருப்பப்படி பாராட்டிக்கொள்ளலாம். கட்சி சார்பில்லாதவர்களும் பாராட்டவோ விமர்சிக்கவோ செய்யலாம். ஆனால், உற்று நோக்கினால், இந்த பட்ஜெட்டில் அரசின் திசையைக் கோடிட்டுக்காட்டும், தாக்கத்தை ஏற்படுத்தக்கூடிய சில சிறப்பம்சங்கள் இருக்கவே செய்கின்றன.

எதையோ எதிர்பார்த்து இருந்த பெரும்பாலானோருக்கு இந்த பட்ஜெட் ஏமாற்றத்தை அளித்துள்ளது என்பது உண்மை தான். அவர்களில் பெரும் பகுதியினர் வருமான வரி செலுத்துவோர். மற்றொரு பகுதியினர், அரசின் திட்டங்கள் மூலம் நிதியுதவி, உணவுப் பொருள் அல்லது வேலை பெற்று வருபவர்கள்.

அரசின் வருமானம் இப்போது அதிகரித்துப் பழைய நிலைக்கு வந்துள்ளதால், அதைக் கொண்டு, தங்களுக்கும் பழைய நிலையை அடையும் வகையில் ஏதாவது உதவி இருக்கும் என்று எதிர்பார்த்தார்கள். ஆனால் அவர்கள் ஏமாற்றமடைந்துள்ளனர். நடுத்தர வர்க்கத்தினர் இதை பகிரங்கமாகவே தெரிவித்து வருகிறார்கள்.

நேரடி வரி விஷயத்தில், குறிப்பிடத்தக்க மாற்றம் எதுவும் இருக்காது என்பது பெரும்பாலானோர் அறிந்ததே, அது தான் நடந்தது. சிறு வரி செலுத்துவோரைத் தவிர, பெரும்பாலானவர்களுக்குப் புதிய சுமை எதுவும் இல்லை என்பது நிம்மதியளிக்கும் அம்சமாகும். அரசு பெரிய திட்டங்களுக்கு நிறைய செலவு செய்யத் திட்டமிட்டுள்ளதுடன், அடுத்த இருபத்தைந்து ஆண்டுகளுக்கான வரைபடத்தையும் வரைந்துள்ளதால் பங்குச்சந்தை மகிழ்ச்சியடைந்துள்ளது.

நிதியமைச்சர் உரையின் முதல் பகுதியில் பட்டியலிட்ட நான்கு தூண்களில் முதலாவது, அதாவது 'ஆபரேஷன் கதி சக்தி' என்பது ஒரு வறண்ட அறிவிப்பாகத் தோன்றினாலும், அதற்குள் பல விஷயங்கள் மறைந்திருக்கின்றன. பல சிறிய மற்றும் பெரிய தொழில்முனைவோர் இந்தத் திட்டம் தங்கள் வாழ்க்கையை எவ்வாறு மாற்றும் என்பதை உணரத் தொடங்கியுள்ளனர். ஆனால் அதற்கு நீண்ட காலம் பிடிக்கும் என்பதும் உண்மை.

பட்ஜெட்டுக்கு முன், பணவீக்கம் மற்றும் வேலையின்மையைச் சமாளிக்க பட்ஜெட்டில் என்ன அறிவிப்பு வெளியாகவுள்ளது என்பது குறித்து விவாதம் எழுந்த நிலையில், இதில் ஆறுதல் அளிக்கும் வகையில், குறிப்பாக விலை உயர்வு விவகாரத்தில், எதுவும் இல்லை. நிதியமைச்சர் தனது உரையின் துவக்கத்தில், 60 லட்சம் வேலை வாய்ப்புகள் பற்றிக் குறிப்பிட்டார். ஆனால் இந்த எண்ணிக்கையை அடைவது என்பது ஒரே இரவில் நடக்கக்கூடிய விஷயமன்று. இது நீண்ட காலத் திட்டமாகும்.

தேர்தல் வரும் சூழலில், தேர்தலுக்காக என்று விமர்சிக்கக்கூடிய அளவில் எந்தப் பெரிய அறிவிப்பும் இல்லை. இது அரசின் துணிச்சலைக் காட்டுகிறது. ஆனால் இந்த நேரத்தில் வளர்ச்சியை விரைவுபடுத்த, ஏழை மற்றும் நடுத்தர வர்க்கத்தினரிடையே பணப்புழக்கத்தை அதிகரித்து, அதன் மூலம் செலவு செய்யும் சக்தியளித்துச் சந்தையில் பணப்புழக்கத்தை அதிகரிக்க இந்த பட்ஜெட் துணியவில்லை என்பதும் உண்மை.

சுதந்திரத்தின் எழுபத்தைந்தாவது ஆண்டு நிறைவில், அடுத்த இருபத்தைந்து ஆண்டுகளுக்கான திட்டங்கள் வரையப்பட்டுள்ளன. உள்கட்டமைப்பு மற்றும் முதலீட்டுத் திட்டங்கள் நாட்டின் வரைபடத்தையும் அதன் விதியையும் மாற்றும் ஆற்றலைக் கொண்டுள்ளன.

அரசு நீண்டகால அடிப்படையில் சிந்திப்பது சிறப்பான அம்சம். ஆனால் மக்கள் அமிர்தம் குடித்துக்கொண்டிருக்கவில்லை என்பதையும் அரசு நினைவில் கொள்ள வேண்டும். இன்று அவர்களுக்குச் சோறும் நீரும் தேவைப்பட்டால் அதை இன்றே கொடுக்க வேண்டும். எதிர்கால கனவுகள் அவர்களுக்குப் பயனளிக்காது.

பிற செய்திகள்:

சமூக ஊடகங்களில் பிபிசி தமிழ்: