ஆயுத இறக்குமதியில் சவுதி அரேபியா முதலிடத்தில்

சவுதி அரேபியா தான் உலகின் மிகப்பெரிய ஆயுத-இறக்குமதி நாடு என்று நாடுகளின் பாதுகாப்புச் செலவினங்கள் தொடர்பான உலகளாவிய புதிய அறிக்கை ஒன்று கூறுகின்றது.

இதுவரை முதல் இடத்தில் இருந்துவந்த இந்தியாவையும் சவுதி அரேபியா இந்த விடயத்தில் முந்தியுள்ளது.

முன்னர் ஐந்தாவது இடத்தில் இருந்த சீனா இப்போது மூன்றாவது இடத்துக்கு வந்துள்ளதாக ஐஎச்எஸ் என்ற அமெரிக்காவை தளமாகக் கொண்டு இயங்குகின்ற சந்தைப் புலனாய்வு நிறுவனம் கூறுகின்றது.

அத்தோடு, கடந்த ஆண்டுடன் ஒப்பிடும்போது இராணுவ தளவாட வியாபாரம் 13 வீதத்தால் அதிகரித்துள்ளது.

மத்திய கிழக்கிலும் ஆசிய பசிபிக் பிராந்தியத்திலும் மோதல்கள் அதிகரித்துள்ள காரணத்தினாலும் வளர்ந்துவரும் பொருளாதாரத்தைக் கொண்ட நாடுகளின் இராணுவ விமானங்களுக்கான தேவை அதிகரித்துள்ளதாலுமே இந்த வியாபார அதிகரிப்பு ஏற்பட்டுள்ளதாகவும் அந்த அறிக்கை கூறுகின்றது.

அமெரிக்கா தான் உலகின் மிகப்பெரிய ஆயுத-ஏற்றுமதி நாடாக தொடர்ந்தும் உள்ளது.

அடுத்த நிலைகளில் ரஷ்யாவும் பிரான்ஸும் உள்ளன.