Муъовини раиси ҷумҳурии Омрико бо раҳбари давлати интиқолии Укройн мулоқот кард
Image copyright
AFP
Муъовини раиси ҷумҳурии Омрико ба нишонаи ҳимоят аз давлати интиқолии Укройн бо мақомоти ин кишвар дидор кардааст.
Рӯзи сешанбеи 22 апрел, Ҷу Бойден, муъовини раиси ҷумҳурии Омрико, ки рӯзи гузашта вориди Киев, пойтахти Укройн, шудааст, ба манзури ибрози ҳимоят аз давлати интиқолии ин кишвар, бо Александр Турчинов, раиси ҷумҳурии муваққати Укройн ва теъдоде аз намояндагони порлумони он кишвар дидор кард.
Сафари оқои Бойден ба Киев дар ҳоле гузориш мешавад, ки авзоъ дар манотиқи ҷануби шарқи Укройн, яъне маҳалли фаъъолияти гурӯҳҳои мусаллаҳи тарафдори Русия ҳамчунон муташанниҷ аст ва нишонае аз иҷрои тавофуқномаи Женев барои поён додан ба ин буҳрон дида намешавад.
Тавофуқномаи Женев ҳафтаи гузашта ва дар ҷараёни нишасти вазирони умури хориҷа ва мақомоти аршади Омрико, Укройн, Иттиҳодияи Урупо ва Русия ба даст омад ва бар асоси он қарор буд афроди "мусаллаҳи ғайриқонунӣ" халъи силоҳ шаванд ва амокини давлатиро, ки ба ишғол даровардаанд, тахлия кунанд ва дар муқобил аз пайгарди қонунӣ тавассути давлати интиқолӣ масун бошанд.
Кӯтоҳмуддате пас аз интишори матни тавофуқнома, ба нақл аз бархе гурӯҳҳои мусаллаҳи тарафдори Русия гузориш шуд, ки давлати интиқолӣ ва порлумони Укройнро "ғайриқонунӣ" медонанд ва то канорагирии онҳо аз қудрат ҳозир ба тарки марокизи ишғолӣ нестанд. Бархе аз нозирон гуфтанд, ки ин изҳорот метавонад нишонаи он бошад, ки эҳтимолан тафсири мавриди назари давлати Русия ва тарафдорони он аз тавофуқномаи Женев бо истинботи кишварҳои ғарбӣ ва давлати Укройн тавофут хоҳад дошт ва иҷрои сареъи ин санадро душвор хоҳад кард.
Дар ҳоле ки ишғоли марокизи давлатӣ тавассути гурӯҳҳои мусаллаҳи тарафдори Русия ҳамчунон идома дорад, мақомоти русӣ давлати марказии Укройнро муттаҳам кардаанд, ки қодир ба ҷилавгирӣ аз иқдомоти гурӯҳҳои миллигарои тундрав алайҳи "таҷаммуъи мусолиматомез"-и тарафдорони Русия нест ва ҳамин мавзӯъ боъис шудааст, то афроди мусаллаҳи мухолифи давлати Укройн нисбат ба амнияти худ эҳсоси нигаронӣ кунанд ва ҳозир ба халъи силоҳ набошанд.
Рӯзи гузашта, Ҷон Керрӣ, вазири хориҷаи Омрико, дар гуфтугӯи телефунӣ бо Сергей Лавров, ҳамтои русии худ, аз давлати Русия хост то ҷудоиталабони укройниро ба иҷрои тавофуқномаи Женев водор кунад ва аз онон ба таври аланӣ бихоҳад марокизи давлатии ишғолшударо ба давлати марказӣ таҳвил диҳанд. Оқои Керрӣ ҳушдори Борок Убомо, раиси ҷумҳурии Омрикоро такрор кард, ки гуфта буд иҷроӣ нашудани тавофуқномаи Женев тайи рӯзҳои ояндаи "авоқибе"-ро барои Русия дар пай хоҳад дошт.
Дар муқобил, ба гуфтаи манобеъи вазорати хориҷаи Русия, оқои Лавров давлати марказии Укройнро дар иҷрои тавофуқи Женев "нотавон ва бетамоюл" тавсиф карда ва гуфтааст, ки мақомоти давлатӣ қодир ё моил ба маҳор кардани "правий сектор" ё гурӯҳи миллигарои тундрави мухолифи Русия нестанд. Давлати Русия аъзои ин гурӯҳро муттаҳам кардааст, ки рӯзи якшанбе ба як посгоҳи ист ва бозрасии нерӯҳои ҷудоиталаб ҳамла карданд ва бо онон даргир шуд. Дар ҷараёни ин даргирӣ ду тан аз ҷудоиталабони мусаллаҳ кушта шуданд.
Пештар вазорати хориҷаи Омрико тасовиреро аз афроди мусаллаҳи тарафдори Русия дар шарқи Укройн мунташир карда ва гуфта буд, ки ин тасовир нишон медиҳад, ки бархе аз ин афрод низомиёни русе ҳастанд, ки ба Укройн эъзом шудаанд.
Буҳрони сиёсии Укройн дар моҳи ноябри соли гузашта ва бо таҷаммуъи эътирозии гурӯҳе аз мардум дар мухолифат бо тасмими Виктур Ёнукович, раиси ҷумҳурии тарафдори Русия дар канор гузоштани сиёсати барқарории равобити наздик бо Иттиҳодияи Урупо ва дар иваз таҳкими равобити иқтисодӣ бо Маскав оғоз шуд. Ин таҷаммуъ баъдан ба хушунат кашид ва дар рӯзи 22 феврал порлумони Укройн дар вокуниш ба кушта шудани даҳҳо тан аз тазоҳуркунандагон оқои Ёнуковичро барканор ва то замони баргузории интихоботи раёсати ҷумҳурӣ Александр Турчиновро ба симати кафили раёсати ҷумҳурӣ интихоб ва кобинеи ҷадидеро мансуб кард.