Шаҳритус: Омӯзиши машоғил ба ҷавонон қабл аз хидмати низомӣ

Image copyright BBC World Service

Ҳукумати ноҳияи Шаҳритуси вилояти Хатлон барои ҷавонони ин ноҳия, ки синнашон ба хидмати низомӣ расидааст, ронандагӣ, сохтмон ва шуғлҳои дигареро меомӯзонад.

Дар марҳилаи аввал 50 нафар аз ҷавонони синни сарбозӣ ба давраҳои омӯзишӣ ҷалб шудаанд ва дар ниҳоят ба онҳо гувоҳиномаҳои ронандагӣ ва тахассусҳои дигареро медиҳанд.

Абдуалим Исмоилов, раиси ноҳияи Шаҳритус, ба хабарнигорон гуфт, ки то мавсими сарбозгирии баҳорӣ бисёре дигар аз ҷавонони ин ноҳия барои хидмати низомӣ дар артиш омода хоҳанд шуд.

Оқои Исмоилов гуфт, ки онҳо бо ин роҳ мехоҳанд таваҷҷуҳи ҷавонони ноҳияро ба зарурати адои хидмати низомӣ ба ватан ҷалб кунанд.

Ҳукумати ноҳияи Шаҳритус аз будҷеи худ барои давраи омӯзишии як ҷавон аз 700 то 800 сомонӣ ихтисос дода ва гуфта мешавад, ки то сарбозгирии баҳорӣ барои шуғломӯзии дигар ҷавонон сармоя ба ҳукумат вогузор мешудааст.

Кумисериёҳои низомии вилоят он идда аз ҷавонеро, ки давраҳои омӯзиширо пушти сар мекунанд, барои хидмати низомӣ ба артиш мефиристад ва ин ҷавонон дар ягонҳои (воинчаст) низомӣ ё макони хидматашон бо гувоҳиномаҳои худ шуғлеро пайдо мекунанд.

Масъулини ҳукумати ноҳияи Шаҳритус бар ин боваранд, ки ҷалби ҷавонон ба омӯзиш метавонад хидмати низомии онҳо дар артишро осон кунад. Ба гуфтаи онҳо, бори аввал аст, ки онҳо чунин давраҳоро барои ҷавонони синни сарбозӣ доир мекунанд.

Ин дар ҳолест, ки дар сарбозгирии баҳории соли 2013 додситони низомӣ масъулони кумисериёҳои низомии ноҳияи Шаҳритусро ба эъзоми ғайриқонунии шогирдони мактабҳо ба хидмати низомӣ муттаҳам карда буд ва алайҳи чанд нафар аз масъулони ин кумисериё парвандаи ҷиноӣ боз кард.

Ба гуфтаи манобеъи додситонӣ, масъулони кумисериёи низомии Шаҳритус ҷавонони клоси 11-ро бо роҳи фиреб ба хидмати низомӣ фиристода буданд. Аммо додситони низомии Хатлон бо гузашти чаҳор моҳ аз шарҳи ин хабар худдорӣ кард ва гуфт, ки парвандаи ҷиноӣ мавриди баррасии додситонҳо қарор дорад.

Манобеъи ҳукумати ноҳияи Шаҳритус гуфтанд, ки онҳо кӯшиш мекунанд, ки дар мавсими сарбозгирии баҳорӣ ҷавонони ин ноҳия дар пайвастан ба хидмати низомӣ пешсаф бошанд.

Ба гуфтаи масъулони ин ҳукумат, ба ҷуз аз роҳандозии давраҳои омӯзишӣ барои ҷавонон, онҳо қасд доранд барномаҳои фарҳангиеро низ барои ҷалби бештари ҷавонон ба хидмати сарбозӣ баргузор кунанд.

Гуфта мешавад, ки бо эъломи замони сарбозгирии баҳорӣ дар соли ҷорӣ дар Тоҷикистон, ин барномаҳо дар рустоҳо ва деҳистонҳои ноҳия доир мешавад.