Мавонеъ дар роҳи тоҷирони эронӣ ба намоишгоҳи Эрон дар Душанбе
Масъулони намоишгоҳи саноеъи Эрон дар Тоҷикистон мегӯянд, ки дар роҳи интиқоли коло барои ин намоишгоҳ дар қаламрави Узбакистон бо душворӣ рӯбарӯ шудаанд.
Ба иддаъои онҳо кормандони гумруки Узбакистон ба ҳангоми расидагӣ ба колоҳои интиқолӣ миқдоре аз онро ба баҳонаи боло будани шумори он мусодира кардаанд.
Бархе аз тоҷирон гуфтанд, ки дар баҳори соли ҷорӣ, мақомоти узбак мӯзаҳои маъмулӣ барои кишоварзон ва сохтмончиёнро дар миёни колоҳои дигар колоҳои низомӣ унвон карда ва иҷозаи интиқоли ин мавод ба Тоҷикистонро надодаанд.
Муҳаммад Умронӣ, як масъули баргузории намоишгоҳои санъатии Эрон дар Душанбе рӯзи сешанбеи 12 ноябр гуфт, ки ин душвориҳо боъис шуда, ки иддае аз ширкатҳои эронӣ аз ширкат дар намоишгоҳҳо дар Тоҷикистон худдорӣ кунанд.
Оқои Умронӣ гуфт: "Ҳарчанд мадорики зарурӣ барои интиқоли колоҳо дуруст буданд ва афроди масъул дар гумруки Узбакистон ҳаққи боз кардани бастабандҳои колоҳоро надоштанд, вале ин муқаррарот риъоят нашуд ва мақомоти Узбакистон бастаҳоро боз карда ва так-таки колоҳоро бозшуморӣ кардаанд."
Оқои Умронӣ гуфт, ин бунёди роҳи оҳан аз қаламрави Эрон ба Афғонистон ва Тоҷикистон метавонад ин душвориҳоро комилан рафъ кунад.
Ҳушанги Тоҷик, масъули ширкати "Плостики Тоҷик" мегӯяд, ки ӯ дар ҷараёни интиқоли бор ба Тоҷикистон тавассути қаламрави Ӯзбакистон ба далели эҷоди мавонеъи маснуъӣ аз сӯйи мақомоти ӯзбак беш аз ҳафт ҳазор дулор хисора дидааст.
Гузориши Зарринаи Хушвақтро дар ҳамин замина аз ин ҷо бишнавед.
Оқои Тоҷик мегӯяд: "Онҳо бояд, танҳо пули тронзити колоро бигиранд ва бигзоранд, ки коло интиқол ёбад. Миқдоре аз колои мо ки булӯр буд, шикаст ва миқдоре низ мусодира шуд. Мо метавонистем, ки колои бештарро ба Тоҷикистон интиқол диҳем, вале бо таваҷҷӯҳ ба мушкилот дар Узбакистон водор шудем, ки қисме аз онро биёрем."
Вай мегӯяд, ки барои бори севвум дар намоишгоҳи саноеъ дар Тоҷикистон ширкат мекунад ва ҳар боре ширкати ӯ аз интиқоли коло аз қаламрави Узбакистон хисора мебинад.
Оқои Тоҷик низ мегӯяд, ки умедаш ба боз шудани роҳҳои иртиботӣ, аз ҷумла роҳи оҳан миёни кишвараш ва Тоҷикистон аст ва ӯ меафзояд, ки он замон ширкатҳои эронӣ маҳсулоти зиёдеро ба ин кишвар хоҳанд овард.
Ин нахустин бор нест, ки ин масъулони намоишгоҳи саноеъи Эрон аз гир кардан ва "бозрасии шадид" ба колои намоишӣ дар қаламрави Узбакистон шикоят мекунанд. Дар баҳори соли ҷорӣ низ масъулони баргузоркунандаи намоишгоҳи эронӣ аз мусодира шудани бархе аз маҳсулоти санъатии ширкатҳои Эрон дар қаламрави Узбакистон хабар дода буданд. Он замон масъулон хисороти ворида аз ин роҳро 40 ҳазор дулор арзёбӣ карда буданд.
Ин дар ҳолест, ки Ҳодӣ Алипур, кордори сафорати Эрон дар Тоҷикистон дар ин маросим бо ишора ба зарфияти иқтисодии мавҷуд дар ду кишвар гуфт, ки Эрон ва Тоҷикистон метавонанд ҳамкориҳои иқтисодӣ ва мизони табодули колоро ба маротиб бештар кунанд.
Оқои Алипур ҳамчунин гуфт: " Умед дорад, ки масъулини иқтисодӣ ва утоқи бозаргонии Тоҷикистон ҳам тартиботеро иттихоз кунанд, ки заминаи ҳузури туҷору санъатгарон ва соҳибони саноеъи тоҷик дар намоишгоҳҳои байналмилалӣ дар Эрон ҳам фароҳам шавад.
Ин 15-умин намоишгоҳи саноъеи Эрон дар Тоҷикистон буда ва ин бор 35 ширкати эронӣ тавлидоти худро дар ин намоишгоҳ ба тамошо гузоштанд.
Ин намоишгоҳ чаҳор рӯзи оянда идома хоҳад дошт ва дар он анвоъи мухталифи маводди ғизоӣ, масолеҳи сохтмонӣ, лӯлаҳои плостикӣ, дастгоҳҳои полоиши об, васоили рӯзгор ва қолиҳои эронӣ ба намоиш гузошта шудаанд.
Бо таваҷҷӯҳ ба мушкилоти интиқоли колоҳо тавассути қаламрави Ӯзбакистон, масъулони намомишгоҳҳо ва масъулони Утоқи бозаргонии Тоҷикистон тасмим гирифтанд, дар оянда бештар фановарӣ ва колоҳои муҳандисиро ба намоишгоҳҳои Тоҷикистон биоваранд.