Раҳмон: “Дар Восеъ бемории сил коҳиш ёфтааст”
Раиси ҷумҳурии Тоҷикистон гуфтааст, дар пайи афзоиши мизони сармоягузорӣ ба бахши беҳдошти ноҳияи Восеъ хуруҷи бемории сил дар ин ноҳия коҳиш пайдо кардааст.
Эмомалӣ Раҳмон, раиси ҷумҳурии Тоҷикистон, рӯзи душанбеи 28 октябр, зимни мулоқот бо сокинони ноҳияи Восеъи вилояти Хатлон гуфтааст, дар замони истиқлолият барои муассисоти беҳдошти ин ноҳия беш аз 17 милюн сомонӣ масраф шудааст.
Ба гуфтаи оқои Раҳмон, танҳо дар соли гузашта барои бахши беҳдошти ноҳияи Восеъ аз буҷети давлатӣ ба миқдори 11 милюн сомонӣ маблағ ихтисос шудааст, ки ин рақам дар муқоиса ба нишондоди соли 1997 312 баробар бештар будааст.
Ӯ гуфтааст: “Дар натиҷа, сатҳи хуруҷи бемории сил дар миқёси ноҳия коҳиш ёфта, тамоюли беморшавӣ, маъюбӣ ва фавт аз ин намуди беморӣ хеле кам шудааст.”
Зимнан, субҳи имрӯз дар рустои ба номи Миралӣ Маҳмадалиеви ноҳияи Восеъ бо ширкати Президенти Раҳмон бемористоне ифтитоҳ шуд, ки барои хидматрасонӣ ба 60 ҳазор сокини рустоҳои Миралӣ Маҳмадлиев ва Гулистони ин ноҳия пешбинӣ шудааст.
Бино ба иттилоъи Раҳмоналӣ Асоев, раиси Маркази мубориза алайҳи бемории сили ноҳияи Восеъ, дар нимсолаи аввали соли ҷорӣ дар ин ноҳия ҳудуди 200 бемори сил сабт шудаанд, ки ин рақам дар муқоиса ба давраи мушобеҳи соли гузашта кам будааст.
Ин дар ҳолест, тибқи гузориши нашрияҳои Тоҷикистон дар рустои Учкуни ин ноҳия бештари хонаводаҳо мубталои бемории сил буда ва солиёна то 20 нафар бар асари ин беморӣ фавт мекунанд. Ба ин далел ин русто дар нашрияҳо “Водии марг” номгузорӣ шудааст.
Ба манзури ҷилавгирӣ аз хуруҷи бемории сил дар минтақаи Кӯлоби вилояти Хатлон, дар моҳи гузашта дар ноҳияи Мӯъминобод, воқеъ дар наздики ноҳияи Восеъ, бунёди осоишгоҳи бемории сил бо 100 кати беморӣ шурӯъ шуда буд.
Дар назар аст, ин осоишгоҳ дар соли оянда мавриди баҳрабардорӣ қарор гирифта ва беморони сили минтақаи Кӯлоб, ки теъдодашон беш аз 2 ҳазор нафар гузориш шуда ва бештари онҳо дар навоҳии Восеъ ва Ҳамадонӣ ба сар мебаранд, дар ин ҷо мудово шаванд.
Бино ба гузориши Созмони Ҷаҳонии Беҳдошт, дар соли гузашта дар Тоҷикистон 6850 тан аз мубталоёни бемории сил сабт шудааст, ки 80 дарсади онҳо барои аввалин бор ташхис ва сабт шудаанд. Ин рақам дар муқоиса ба нишондодҳои Иттиҳоди Давдатҳои Мустақили Ҳамсуд бештар будааст.