Раҳмон аз мардумаш хост барои суботи кишвар дуъо кунанд
Раиси ҷумҳури Тоҷикистон мардуми кишварашро бо фарорасии иди Қурбон табрик гуфта ва ба мардумаш таъкид кард, ки дар вақти адои намози ид “барои сулҳу суботи кишвар” дуъо кунанд.
Пайёми имсолаи Президент Раҳмон ба гунаи солҳои қаблӣ аз фазилатҳои ин иди мазҳабӣ ёдовар шуда ва таъкид кард, ки “ин иди саъид таҷассумгари эътиқод, имон, ғояҳои некию адолату инсондӯстӣ, рамзи раҳму шафқат ва меҳрубонӣ ба атрофиён мебошад”.
Ҳамчунин оқои Раҳмон гуфтааст, ки иди Қурбон саршор аз беҳтарин арзишҳои инсонпарварию мардумнавозӣ буда ва мардуми Тоҷикистон ин идро “дар фазои суботи сиёсӣ, пойдорӣ ва устувории ваҳдати миллӣ, ҷаҳду талошҳои созанда ва бунёдкорона барои расидан ба зиндагии шоиста ва эъмори ҷомеаи демукратӣ, ҳуқуқбунёд ва дунявӣ истиқбол мегиранд”.
Сипас раиси ҷумҳури Тоҷикистон дар пайёми имсолаи худ мукарраран ба мавзӯъи кӯмак ба ниёзмандон рӯй оварда ва гуфтааст, ки “яке аз фазилатҳои асосии иди Қурбон дасти ёрӣ дароз кардан ба мискинону ниёзмандон аст”.
Ҳамасола баргузории Иди Қурбон бо анҷоми маросими Ҳаҷ мувофиқ мешавад ва Президент Раҳмон низ аз ин мавзӯъ сарфи назар накардааст. Дар соли ҷорӣ беш аз шаш ҳазор сокини Тоҷикистон озими зиёрати муқаддасоти ислом шудаанд.
Эмомалӣ Раҳмон дар пайёми худ ба ин мавзӯъ ишора карда ва гуфтааст, ки “Ҳоҷӣ шудан маънои танҳо ба зиёрати хонаи Худо мушарраф шуданро надорад, балки таваллуди дуюмбораи маънавӣ, таҳкими ахлоқи ҳасана, ба даст овардани покии рӯҳониву ахлоқӣ ва намунаи инсони комил шудан аст”.
Президент Раҳмон изҳори боварӣ кардааст, ки ҳоҷиёни тоҷик “саҳми арзандаи хешро дар тарбияи ахлоқии ҷавонону наврасон, ба роҳи дуруст раҳнамоӣ кардани онҳо, инчунин дар корҳои созандагӣ ва бунёдкорӣ дареғ нахоҳанд дошт”.
Ба гуфтаи раиси ҷумҳури Тоҷикистон дар ин кишвар ҳамаи шароит барои озоди виҷдон фароҳам шуда ва “тафаккури мазҳабӣ бояд ба таъмини пойдории истиқлоли кишвар, рушди босуръати иҷтимоъиву иқтисодӣ ва суботи сиёсии мамлакат мусоидат намояд”.
Ӯ афзуд: “Муассисаҳои динӣ, аз ҷумла масҷидҳо дар шароити ҷаҳони муосир натанҳо макони ибодат бошанд, балки ба маркази фарҳангу одоб, мактаби одамият ва тарбияи ахлоқиву маънавии мусулмонон табдил ёбанд”.
Дар робита ба мавзӯъи омӯзишу парвариш оқои Раҳмон ҳамчунинн гуфтааст, “аз ҳар як падару модар талаб карда мешавад, ки масъулият ва қарзи худро дар назди фарзандонашон дарк карда, ба хотири фароҳам овардани шароит барои донишандӯзӣ ва тарбияи солими онҳо кӯшиш намоянд”.
"Шукрона кунем"
Дар поёни пайёми табрикотии худ оқои Раҳмон мусалмонони кишварро муҷаддадан ба шукргузорӣ даъват карда ва гуфтааст, ки “ба қадри неъмати бебаҳои давлати озоду соҳибихтиёр, сулҳу суботи сиёсӣ ва сарзамини ободу зебои худ расем ва шукронаи онҳоро ба ҷо орем”.
Вай ҳамчунин таъкид кардаст, ки “мусалмонони кишварамон тамоми рукнҳои дини мубини исломро озодона иҷро менамоянд, зеро қонунгузории давлати демократиамон озодии эътиқод ва виҷдонро ҳамчун ҷузъи таркибии ҳуқуқу озодиҳои инсон ва шаҳрванд кафолат медиҳад”.
Бо тасмими Шӯрои исломии Тоҷикистон рӯзи иди Қурбон 15-уми октябр муқаррар шудааст. Маъмулан рӯзи иди Қурбон бо баргузории намози ид дар масоҷиди кишвар оғоз шуда ва сипас сокинон ба аёдати пайвандони худ мераванд.
Қурбонӣ ва таҳияи хонҳои идона аз рукнҳои дигари баргузории иди Қурбон аст. Оқои Раҳмон ба ин мавзӯъ низ ишора карда ва гуфта, ки “қурбонӣ рамзи садоқату вафодорӣ ва имону тақво ба Худои таоло мебошад”.
Маъмулан ҳамасола дар остонаи баргузории ҷашнҳои мазҳабӣ дар бозорҳои Тоҷикистон болоравии қимати ғизо мушоҳида мешавад. Вале имсол ин мавзӯъ чандон ҳассос набудааст.