Президент Раҳмон озими водии Рашт шуд
Эмомалӣ Раҳмон, раиси ҷумҳури Тоҷикистон бо сафари серӯза озими бархе аз навоҳии водии Рашт шуд.
Дафтари матбӯъотии раёсати ҷумҳурии Тоҷикистон хабар дода, ки президент Раҳмон аз навоҳии Рашт, Тавилдара, Нуробод, Ҷиргатол ва Тоқикобод дидан хоҳад кард.
Мулоқот бо сокинони маҳаллӣ ва гушоиши бархе аз марокизи пизишкиву фароғатӣ аз аҳдофи ин сафар унвон мешаванд.
Дафтари матбӯъотии Президент Раҳмон хабар медиҳад, ки раиси ҷумҳури Тоҷикистон субҳи 25-уми сентябр нахуст дар маросими ифтитоҳи сохтмони ҷадиди пулис дар шаҳраки Навобод ва сипас гушоиши ятимхонае дар ин минтақа ширкат кардааст.
Оқои Раҳмон ҳамчунин аз воҳиди низомии шумораи 051062-и Горди миллии Тоҷикистон дар шаҳраки Навобод дидан карда ва сарбозони онро “ба хизмати содиқонаи халқу Ватан” даъват кардааст.
Сафари Президент Раҳмон ба водии Рашт дар ҳоле сурат мегирад, ки ахиран Нуриддин Темиров, раиси кони ангишти “Назарайлоқ”, воқеъ дар ин минтақа ба сурати мармуз кушта шуд. Ниҳодҳои интизомӣ то ҳол омилони ин қатлро ошкор насохтаанд.
Водии Рашт аз минтақаи таҳти нуфузи нерӯҳои мухолифи давлат дар солҳои ҷанги дохилӣ маҳсуб шуда ва бархе аз амалиёти низомӣ дар солҳои 1992-1997 дар ин минтақа сурат гирифтаанд.
Баъд аз имзои созишномаи сулҳи миёни тоҷикон дар соли 1997 ин минтақа ҳамчунон аз манотиқи "ноамн"-и кишвар маҳсуб шуда ва гоҳ-гоҳе дар он ҷо даргириҳое сурат мегиранд.
Бархе аз соҳибназарон ҳадс мезананд, сафари феълии оқои Раҳмон ба минтақаи Рашт ба таблиғоти қаблазинтихоботии вай рабт дорад ва раиси ҷумҳури Тоҷикистон қасд дорад, дар дидор бо сокинони минтақа раъйи онҳоро ба даст биоварад.
Зимнан, тӯли ду соли ахир Президент Раҳмон аз ин минтақа дидан накарда ва чунин тасаввуре ба вуҷуд омадааст, ки оқои Раҳмон аз ҳаводиси ахир дар ин минтақа изҳори нигаронӣ дорад.
Мирзохӯҷа Аҳмадов, яке аз фармондеҳони собиқи нерӯҳои мухолифи давлати Тоҷикистон, ки то чанд соли қабл бо нерӯҳои давлатӣ вориди даргирӣ шуда ва сипас бо давлат ҳамкорӣ кардааст, аз афроде маҳсуб мешавад, ки мухолифон дар атрофи вай сарҷамъ шаванд.
Ҳадс зада мешавад, ки эҳтимол дорад оқои Раҳмон дар ҷараёни сафараш ба водии Рашт бо оқои Аҳмадов дидор ва гуфтугӯ кунад. Вале дафтари матбӯъотии Президент Раҳмон ва худи Мирзохӯҷа Аҳмадов чунин эҳтимолро баъйид медонанд.
Ин дар ҳолест, ки дар як моҳи ахир дар барномаи кори Президент Раҳмон боздиди зиёди вай аз манотиқи мухталифи Тоҷикистон мушоҳида мешавад. Оқои Раҳмон дар ҷараёни ин сафарҳо дар маросими ифтитоҳи корхонаҳову муъасиссот ва сӯҳбатҳо бо мардум машғул аст.