Пешниҳоди номзадии Раҳмон аз сӯйи иттиҳодияҳои синфӣ

  • 24 Сентябр, 2013

Анҷумани Федеросиюни иттиҳодияҳои синфии (иттифоқҳои касаба ё профсоюз) Тоҷикистон номзадии Эмомалӣ Раҳмонро ба интихоботи раёсати ҷумҳурии ин кишвар пешниҳод кардааст.

Ин дувумин ниҳоди иҷтимоъист, ки оқои Раҳмонро ба интихобти раёсати ҷумҳурӣ номзад мекунад. Рӯзи шанбеи гузашта дар анҷумани Созмони ҷавонони Тоҷикистон номзадии оқои Раҳмон ба интихоботи раёсати ҷумҳурӣ пешниҳод шуд.

Ҳамакнун интизор меравад номзадии раиси ҷумҳури феълии Тоҷикистон дар анҷумани Ҳизби ҳокими халқи демукрот ва маҷолиси вилоёти Тоҷикистон муъаррифӣ шавад.

Анҷумани Федеросиюни иттиҳодияҳои синфии Тоҷикистон созмони иҷтимоъиест, ки тибқи қавонини кишвар аз ҳаққи пешниҳоди номзади интихоботи раёсати ҷумҳурӣ бархурдор аст.

Ин федеросиюн як созмони бонуфузи иҷтимоъист, ки ду милюну 100 ҳазор узв дорад. Ин созмон соли 1926 таъсис шуда ва меросбари созмоне мушобеҳ дар замони шӯравии собиқ аст.

Анҷумани қабл аз интихоботи ин федеросиюн рӯзи сешанбеи 24-уми сентябр баргузор шуд. Гуфта мешавад аз номзадии Эмомалӣ Раҳмон 246 нафар, яъне ҳамаи вакилони ин анҷуман, пуштибонӣ кардаанд.