ҲНИТ матни 'баёнияи фармоишии мақомот' алайҳи худро интишор дод
Ҳизби наҳзати исломии Тоҷикистон матни баёнияеро, ки иддаъо мешавад мақомот барои аъзои таҳти фишори ин ҳизб дар Бадахшон таҳия кардаанд, интишор додааст.
Матни ин баёния ба изофаи аксе аз нусхаи чопии он, ки зоҳиран дар ихтиёри аъзои Ҳизби наҳзати исломӣ (ҲНИТ) қарор гирифта, рӯзи шанбеи 17 август дар торнамои ин ҳизб мунташир шуд.
Ин баёния, ки матнаш ҳовии иштибоҳоте имлоист, "Муроҷиъати раисони бахшҳои ҲНИТ дар ш. Хоруғ, н. Шуғнон ва н. Рӯшон" унвон дорад. Тибқи иддаъои масъулони ҳизби наҳзати исломӣ, "мебоист онро дар шабакаҳои давлатӣ роҳбарон ва аъзои "хориҷшуда" аз ҲНИТ қироат кунанд."
Ҳизби наҳзати исломӣ, ки танҳо ҳизби мазҳабӣ ва бонуфузтарин ҳизби мухолиф дар Тоҷикистон маҳсуб мешавад, мақомоти маҳаллӣ дар вилояти мухтори Кӯҳистони Бадахшонро ба фишор бар фаъъолонаш, аз ҷумла таҳияи ин баёния ва водор сохтани раҳбарони маҳаллии ҳизб ба хондани он дар назди дурбини телевизиюнҳои давлатӣ муттаҳам кардааст.
Ду рӯз пеш торнамои ҲНИТ аз қавли Амирбек Қаёмбеков, раҳбари маҳаллии ин ҳизб дар ноҳияи Рӯшон, оварда буд: "Дирӯз (14 август) маро амният фарёд кард. Ман бар зидди ҲНИТ ягон навъ муроҷиъат ва баёния надодам. Муроҷиъатномаи тайёршудае, ки дар пеши онҳо буд, ман онро нахондам."
Шаби 5 август шабакаи аввали телевизиюни давлатии Тоҷикистон Асрор Булбулов, кафили раёсати бахши маҳаллии ҲНИТ дар шаҳри Хоруғро нишон дод, ки баёнияеро дар бораи фаъъолияти ин ҳизб дар Бадахшон қироат мекард.
Вай аз ҷумла раҳбарони ҲНИТ-ро ба дурӯғгӯйӣ муттаҳам кард ва гуфт, ки теъдоди аъзои ин ҳизб дар вилояти Бадахшон танҳо 37 нафарро ташкил медиҳад. Ин дар ҳолест, ки тибқи арқоми ҲНИТ теъдоди аъзои он дар Бадахшон ҳудуди 3 ҳазор нафар будааст.
Оқои Булбулов, ки ба гуфтаи бисёре аз бинандагони телевизиюн, осори фишор ва азият бар чеҳрааш намудор буд, ҳамчунин эълом дошт, ки дар Бадахшон ба ҳизби наҳзати исломӣ ҳеч ниёзе нест ва ин ҳизб бояд баста шавад.
Аммо раҳбарони ҲНИТ ин иддаъоҳоро рад карданд ва гуфтанд, ки суханронии оқои Булбулов дар телевизиюни давлатӣ таҳти фишори маъмурони амниятӣ сурат гирифтааст.
Дар пайи ин, Ҳизби наҳзати исломӣ ҳайъатеро барои баррасии масоили идорӣ ва интихобот ба Бадахшон эъзом кард. Аммо шаби панҷшанбе ин ҳизб аз ҳамлаи гурӯҳе 10-12-нафарӣ ба мошини ҳовии ин ҳайъат дар ноҳияи Рӯшон хабар дод.
Торнамои ҲНИТ рӯзи ҷумъа гузориш кард, ки мавориди мушобеҳи фишори маъмурони давлатӣ бар аъзои он дар ноҳияи Рашт ҳам сабт шудааст. Аз ҷумла, мақомоти маҳаллӣ аз як узви 83-солаи ин ҳизб хостаанд, ки дар телевизиюн суханронӣ кунад ва бигӯяд, ки "ин ҳизб даркор нест."
Мақомоти Тоҷикистон ин иддаъоҳоро расман таъйид ё такзиб накардаанд. Аммо манобеъи огоҳ мегӯянд, ки дар остонаи интихоботи раёсати ҷумҳурӣ давлат ба корзори густардаи таблиғотӣ алайҳи мухолифон ва рақибони эҳтимолии Президент Раҳмон оғоз кардааст.
Аз ҷумла гуфта мешавад, ки давлат бо ончи "ҷанги иттилоъотӣ" алайҳи мухолифон номида шуда, даргир аст ва маболиғи ҳангуфтеро барои иҷрои тарҳҳои таблиғотӣ дар матбӯъот, родию ва телевизиюнҳои давлатӣ ва ҳатто дар шабакаҳои иҷтимоъӣ ҳазина мекунад, ҳарчанд ин иттилоъ ба таври мустақиллона ва расман таъйид нашудааст.
Дар ҳамин ҳол, рӯзи шанбе дар ҷаласаи бахши маҳаллии ҲНИТ дар шаҳри Хоруғ Саодатшоҳ Адолатшоев бо аксари орои вакилон раҳбари маҳаллии ин ҳизб дар Бадахшон интихоб шудааст.
Аз замони амалиёти шаҳри Хоруғ дар тобистони соли гузашта Муслима Броимшоева, кафили раёсати бахши маҳаллии ҲНИТ дар Бадахшон ва оқои Адолатшоев муъовини ӯ буд. Ҳамчунин, Розия Имомназарова раиси бахши Ҳизби наҳзати исломӣ дар шаҳри Хоруғ интихоб шудааст.