Ҳамла ба гурӯҳи кории ҲНИТ дар Бадахшон
Як ҳайъати 7-нафарии Ҳизби наҳзати исломии Тоҷикистон (ҲНИТ) ба раҳбарии Зарафо Раҳмонӣ, мушовири раҳбари ин ҳизб, дар вилояти Бадахшон мавриди ҳамлаи афроди номаълум қарор гирифтааст.
Ҳикматулло Сайфуллозода, сухангӯйи ҲНИТ, дар истинод ба Зарафо Раҳмонӣ гуфт, ки ин ҳодиса ҳудуди соъати 8 шоми панҷшанбеи 15 август дар минтақаи Чашмаи Фотимаи ноҳияи Рӯшон рух додааст. Чанд тан аз ҷавонон дар худрави мавсум ба "Тангем" пеши роҳи худрави "Старекс"-и онҳоро гирифтаанд.
Оқои Сайфуллозода гуфт, ки ин афрод бо лаҳни хашин ва таҳқиромез аз аъзои ҳайъати ҲНИТ пурсидаанд, ки кӣ ҳастанд ва ба куҷо равонаанд. Вақте аз онҳо суол шудааст, чи афроде ҳастанд, як ҷавон узви ҳайъати ҲНИТ-ро кутак задааст ва ҳайъат маҷбур шудааст, аз маҳалли ҳодиса фирор кунад.
Ӯ гуфт, ки пас аз расидани хабари ҳамлаи афроди номаълум ба ҳайъати ҳизби наҳзати исломӣ дар вилояти Бадахшон Муҳиддин Кабирӣ, раҳбари ҲНИТ, дастур додаст, ки ин ҳайъат худро ба посгоҳ ё идораи пулис расонад.
Дар шаҳри Хоруғ ҳайъати ҲНИТ ба масъулони идораи умури дохилӣ дар мавриди ин қазия хабар додаанд. То ҳол ҳувияти муҳоҷимон рӯшан нашуда, аммо сухангӯйи ҲНИТ ҳадс мезанад, ки мумкин аст ин ҷавонон аз манотиқи марказии Тоҷикистон ба манзури ворид кардани халал ба фаъъолияти ин ҳайъат ба Бадахшон эъзом шуда бошанд.
Дар ҳамин ҳол, Тоҷиддин Назришоев, раиси Идораи умури дохилаи вилояти Бадахшон, зимни суҳбате телефунӣ бо Би-би-сӣ хабари шикояти ҳайъати ҲНИТ дар мавриди ҳамлаи афроди номаълумро таъйид кард.
Ҳамзамон, оқои Назришоев гуфт, ки дар ҷараёни таҳқиқи ин қазия рӯшан шуда, ки дар ҳеч посгоҳи пулис дар навоҳии Рӯшон ва Шуғнон худрави "Тангем"-и бидуни шумораи давлатӣ сабт нашуда ва сокинони маҳалли ҳодиса дар ноҳияи Рӯшон ин худрав ва ҷавонони номаълумро надидаанд.
Ӯ чунин натиҷагирӣ кард, ки мумкин аст ҳайъати ҲНИТ ба хотири ҷалби таваҷҷуҳи сокинони вилояти Бадахшон ба ҳамчунин саҳнасозӣ дар бораи ҳамла даст зада бошанд.
Масъулони Ҳизби наҳзати исломии Тоҷикистон ин ҳодисаро идомаи мавориди таъқибу фишор бар аъзои ин ҳизб арзёбӣ карданд, ки ба гуфтаи онҳо, дар соли ҷорӣ зиёд иттифоқ афтодааст.
Аз ҷумла, онҳо ба лату кӯби Маҳмадалии Ҳаит, муъовини раҳбари ҲНИТ, дар наздикии манзилаш дар шаҳри Душанбе аз сӯйи афроди номаълум ва ҳамалоти лафзию гузоришҳои зиёд дар расонаҳои расмӣ алайҳи ин ҳизб ишора карданд.
Ҳамзамон, фаъъолони Ҳизби наҳзати исломии Тоҷикистон гуфтанд, ки ҳодисаи ҳамла ба ҳайъати ҲНИТ дар барномаи сафари он дар вилояти Бадахшон асаре надошта, фаъъолони ҳизб озими ноҳияи Ишкошим шудаанд ва дар он ҷо бо аъзои ҲНИТ ва мақомоти маҳаллӣ дидор хоҳанд кард.
Сипас, дар назар аст, ки аъзои ин ҳайъат дар шаҳри Хоруғ дар кунфронси шаҳрии ҲНИТ, ки дар он ҳайъати раҳбарии бахши маҳаллии ин ҳизб дар Хоруғ интихоб мешавад, ширкат кунанд.
Интизор меравад Ҳизби наҳзати исломии Тоҷикистон дар мавриди ҳамла ба ҳайъаташ дар вилояти Бадахшон вокуниши расмӣ кунад.