Вазорати фарҳанг ба нашрияи Наҷот ихтор дод
Вазири фарҳанги Тоҷикистон зимни ирсоли номае ба “Наҷот”, нашрияи ҳизби наҳзати исломии кишварро дар “қонунвайронкунӣ” муттаҳам кардааст.
Дар ин нома, ки дирӯз, 12-уми август ба дасти нашрияи масъулони ин ҳизби умдаи мухолиф расид, омадааст, ки мақолаи мавсум ба “Хоруғ”, ки дар авохири моҳи гузашта дар нашрия чоп шуд бо қонуни Тоҷикистон дар бораи матбуъот муғойират доштааст.
Дар ин нома, ки унвонии Ҳикматулло Сайфуллозода, сардабири нашрияи “Наҷот” навишта шуда, омадааст: “Вазорати фарҳанг сармақолаи “Хоруғ”-ро... мавриди баррасӣ қарор дода, Шуморо барои қонунвайронкунӣ расман огоҳ мекунем.”
Вазири фарҳанг ба бандҳо ва зербандҳои қонуни Тоҷикистон дар бораи матбуъот ишора кардааст, ки ба пойин бурдани шаъну шарафи шахси ҳуқуқӣ марбутанд, ва ба иддаъои ӯ мақолаи мавриди назар ин банҳоро нақз кардааст.
Дар ин нома ҳамчунин омадааст: “Вазорати фарҳанг хоҳишманд аст, ки минбаъ аз таҳия ва дарҷи маълумоти носаҳеҳ ва хилофи қонунгузорӣ худдорӣ кунед”.
Нома афзудааст, ки дар сурати “такрор ёфтани чунин амалҳои суйистифода аз озодии сухан Вазорати фарҳанг дар доираи қонунгузорӣ тадбирҳо хоҳад андешид”.
Аммо Ҳикматулло Сайфуллозода, сардабири “Наҷот” ва таҳлилгари аршади ҳизби наҳзати исломии Тоҷикистон мегӯяд, ҳарчанд пас аз дарёфти ҳушдори ин ниҳоди давлатӣ дубора ба мақола мурар карда ва ба ҷуз аз иштибоҳи фаннӣ дар он пайдо накардааст.
Ӯ дар сӯҳбат бо Би-би-сӣ гуфт: “Дар инҷо (дар нома) дақиқ гуфта нашудааст, ки куҷои мақола муғойири қонун аст.”
Ӯ афзуд: “Вале ман гумон мекунам, ки инҷо фақат як масъала аст, ки он ҳам аз нигоҳи техникӣ рух додааст. Дар ҷое, ки мо “низомиҳои ҳукумат” гуфтаем, агар онҳо мафҳуми ҳукуматро ҳамчун шахси воқеъӣ медонанд пас ин иштибоҳи техникӣ аст, ман қабул дорам, аммо ман мегӯям, ки ҳукумат ом аст, ҳамаи мақомоти болоӣ ҳукумат метавонад бошад, “низомиҳои ҳукумат” метавонанд низомиҳои вазорати дифоъ бошанд ё ҳар ҷои дигар.”
Бо ин ҳама оқои Сайфуллозода мегӯяд, ки дар маҷмӯъ ин номаи вазорати фарҳангро як иқдоме дар радифи дигар иқдомоти мақомоти давлатӣ барои омодагӣ ба интихобот арзёбӣ мекунад.
Ӯ мегӯяд: “Фикр мекунам, ки чунин огоҳ карданҳо ба хотири раванди интихобот аст, ки ҳадафашон пешгирии баъзе ибрози назарҳоест, ки алайҳи ҳукумат равона шудаанд.”
Мақолаи таҳти унвони “Хоруғ”, ки дар нашрияи “Наҷот” рӯзи 25-уми июл чоп шуд, талафоти ҷонии ғайринизомиён дар ҷараёни амалиёти низомии дурӯза дар шаҳри Хоруғ дар тобистони соли гузашта маҳкум шудааст.
Дар ин мақола аз ҷумла мехонем: “Агар имрўз аҳли ҷомеъаи кишвар, дар умум, дар мавриди амалиёти низомии порсолаи нерўҳои ҳукуматӣ дар Хоруғ чизи аниқу дақиқеро дарёфт накарда бошанд ҳам, барои сокинони Бадахшон, бахусус хоруғиён ҷузъитарин ҷанбаҳои ин масъала ошкоранд.”
Ҳизби наҳзати исломии Тоҷикистон аз умдатарин ҳизби мухолифи ҳукумати феълӣ ва танҳо ҳизби расмии мазҳабӣ дар Осиёи Миёна аст.
Бо наздик шудани замони интихоботи раёсати ҷумҳурии Тоҷикистон дар моҳи ноябри соли ҷорӣ, муборизаи сиёсӣ миёни ҳизби ҳокими халқи демукрот ва рақиби аслии он, ҳизби наҳзати исломии Тоҷикистон шиддат мегирад.
ҲНИТ дар зарфи як соли ахир ба сурати афзояндае мавриди фишори давлат қарор гирифтааст. Ин ҳизб гузориш дода, ки мақомоти маҳаллӣ иҷозаи баргузории ҷаласоти ҳизбӣ дар минтақаҳоро намедиҳанд ва бархе аз аъзои ҳизбро водор ба қатъи узвият дар ҳизб кардаанд. Дар зарфи ин муддат ҲНИТ дар бораи ҳамлаҳои машкук алайҳи бархе аз аъзояш низ гузориш додааст.