Ожонси зиддифасод: "Ҳамаи масъулони ҳамдаст бо Зайд Саидов муҷозот хоҳанд шуд"
Раиси Ожонси мубориза бо фасоди Тоҷикистон мегӯяд, ҳамаи афроди дастдошта дар хусусисозии "ғайриқонунии" корхонаҳои давлатӣ аз сӯйи Зайд Саидов, вазири собиқи саноъеи ин кишвар, муҷозот хоҳанд шуд.
Фаттоҳ Саидов, ҳамчунин гуфт, ки таҳқиқоти беш аз ду моҳаи парвандаи ҷиноии Зайд Саидов, собит кардааст, ки ӯ 15 корхонаи давлатиро ғайриқонунӣ аз худ кардааст.
Оқои Саидов ин иттилоъро, рӯзи душанбеи 29-уми июл дар нишасти матбӯъотии ожонс дар ихтиёри хабарнигорони расонаҳои дохилӣ ва хориҷӣ гузошт.
Дар ин нишаст феҳристи корхонаҳои санъатӣ, ки Зайд Саидов дар аз худ кардани онҳо муттаҳам мешавад, дар ихтиёри хабарнигорон гузошта шуд.
Корхонаҳои "Абрешим", "Тоҷикатлас", "Тоҷик-азот" ва корхонаи кучаки мавсум ба "Лаъл" аз ҷумлаи муассисоте ҳастанд, ки ба гуфтаи раиси ожонси мубориза бо фасод, Зайд Саидов онҳоро "ғайриқонунӣ аз худ кардааст".
Ба гуфтаи масъулони ин ниҳод оқои Саидов ин корхонаҳоро дар тӯли солҳои 1999 то 2006, яъне замоне, ки раҳбарии вазорати саноъеро бар уҳда дошт ба худ ихтисос додааст.
Аммо суоли матраҳ ин аст, ки чӣ гуна мақомоти зидахли ниҳодҳои давлатӣ, ки бояд ба раванди хусусикунонии "ғайриқонунии" ин корхонаҳои давлатӣ дар он замон назорат мекарданд, иҷоза доданд, ки Зайд Саидов ин корхонаҳоро ба худ, ё ба хешовандонаш ихтисос бидиҳад ва танҳо баъд аз замони эъломи тасмим бар таъсиси ҳизб тавассути ӯ иттиҳомоти иқтисодиро алайҳи ӯ матраҳ карданд.
Фаттоҳ Саидов дар ҷараёни нишасти матбӯъотии рӯзи душанбе дар посух ба ин савол мадорикеро, ки дар он ба гуфтаи ӯ имзои ҳудуди даҳ ниҳоди зирабт вуҷуд дошт, ба хабарнигорон нишон дода гуфт: "Мо ҳамаи онҳоро, ки дар хусусикунонӣ гунаҳкор ҳастанд, муҷозот хоҳем кард."
Аммо ӯ афзуд, ки бисёре аз ин мақомоти вақт то ҳоло ба ожонсӣ даъват шуда, шавоҳид додаанд, ки бар асоси ин шавоҳид бештаре аз онҳо собит карданд, ки дар ин ҷароим даст надоштаанд.
Бархе аз коршиносон бо ишора ба он, ки бисёре аз мақомоти Тоҷикистон бо истифода аз "хешигарӣ" курсиҳоро дар бахше аз вазоратхонаҳо касб кардаанд, мегӯянд ба муҷозот кашида шудани бисёре аз онҳо баъид аст.
Масъулони ожонси мубориза бо фасод ҳамчунин гуфтаанд, ки бар асоси шавоҳиди Серик Окушев, соҳибкори Қазоқистон мавориди ришваситонии Зайд Саидов низ собит шуда ва тибқи гуфтаҳои оқои Окушев, вай ба Зайд Саидов ҳудуди як милюн дуллор ришва додааст.
Дар ҳоле, ки қонуни кайфарии Тоҷикистон барои додани ришва низ муҷозот дар назар дорад, масъулони ожонси мубориза бо фасоди Тоҷикистон гуфтаанд, ки Серик Окушев ба сабаби ироаи довталабонаи шавоҳид аз ин муҷозот маъоф шудааст.
Вукалои мудофеъи Зайд Саидов мегӯянд, муваккилашон ҳамаи иттиҳомоти ворида алайҳи худро рад намудааст.
Нахустин иттиҳомот алайҳи Зайд Сайидов дар моҳи майи соли ҷорӣ, пас аз он, ки ӯ ба унвони раиси гурӯҳи мубтакирон аз таъсиси ҳизбе ҷадид ба номи "Тоҷикистони нав" дарак дод, эълом шуд.
Ӯ рӯзи 19 май баъд аз боздошташ дар фурӯдгоҳи шаҳри Душанбе панҷ рӯзро дар бинои Ожонси мубориза бо фасоди Тоҷикистон сипарӣ кард ва то ҳоло дар боздоштгоҳи муввақати Кумитаи амнияти миллии Тоҷикистон ба сар мебарад.
Боздошт ва зиндонӣ шудани оқои Саидов вокунишҳои мухталиферо дар ин кишвар дар пай дошт ва бисёре аз намояндагони аҳзоби сиёсӣ аз ин иқдом мақомоти давлатӣ шадидан интиқод карданд.
Ҳафтаи гузашта Кумитаи ҳуқуқи башари Созмони Милали Муттаҳид аз "боздошти худсаронаи" Зайд Саидов, мубтакири таъсиси ҳизби ҷадиди "Тоҷикистони нав" ва сиррӣ будани парвандаи ӯ дар Тоҷикистон ибрози нигаронӣ кард.
Ин кумита бо пахши баёнияе таъқиби мухолифон дар Тоҷикистон ва Укройнро дорои "ангезаҳои сиёсӣ" арзёбӣ кард.
Дар ин баёния омадааст: "Кумитаи СММ дар бораи раҳбарони мухолифе, ки дар Тоҷикистон бо ангезаҳои сиёсӣ ва ба хотири ҷилавгирӣ аз ширкати онҳо дар интихоботи оянда озору азият шудаанд, гузоришҳое дарёфт кардааст."