Парвандаи ҷиноӣ барои ҷалби ҷавонон ба артиш бо роҳи фиреб
Додситони низомӣ дар вилояти Хатлон алайҳи масъулони кумисориёи низомии ноҳияи Шаҳритус, ба иттиҳоми истихдоми 23 донишомӯз ба артиш парвандаи ҷиноӣ боз кардааст.
Ба гуфтаи манобеъи додситонӣ, масъулони ин кумисориёи низомӣ ҷавонони клоси 11-ро бо роҳи фиреб ба хидмати низомӣ истихдом кардаанд.
Додситонии вилояти Хатлон мегӯяд, масъулони кумисориёи низомии ноҳияи Шаҳритус дар мавсими даъвати баҳорӣ 23 донишомӯзи клоси 11-ро, ки барои таҳсили ин ҷавонон дар мактаб беш аз як моҳи дигар боқӣ монда буд, барои хидмат ба артиши миллии Тоҷикистон басиҷ кардаанд.
Тибқи таҳқиқоти муқаддамотӣ масъулони кумисориёи низомӣ ба ин ҷавонон қавл додаанд, ки онҳо гувоҳиномаи хатми мактаби ҳамагониро баъди ду соли анҷоми хидмати низомӣ дар артиш дар канори шаҳодатномаи хидмати низомӣ дарёфт хоҳанд кард.
Ин парванда дар пайи шикояти волидони ин донишомӯзон ба додситони ноҳия боз шудааст.
Яке аз онҳо, ки аз ифшои номаш худдорӣ кард, мегӯяд, ки кормандони кумисориёи низомии ноҳияи Шаҳритус ба хотири "иҷрои плони" даъвати ҷавонон ба артиш донишомӯзонро бо роҳи фиреб ба артиш эъзом кардаанд.
Маҳмадалӣ Алимардонов, додситони низомӣ дар вилояти Хатлон дар суҳбати телефунӣ ба Би-би-сӣ гуфт, ки таҳқиқи ин парванда идома дорад ва танҳо баъд аз ирсоли парванда ба додгоҳ иттилоъоти бештареро дар мавриди ин қазия дар ихтиёри хабарнигорон хоҳад гузошт.
Ӯ нагуфт, ки муттаҳамони ин парванда тибқи кадом моддаи қонуни кайфарии Тоҷикистон муттаҳам шудаанд. Ба гуфтаи ӯ, қувваи қазоияи Тоҷикистон бо чунинин қазия барои бори нахуст рӯбарӯ мешавад ва ҳанӯз маълум нест, ки муқассирон дар ин қазия тибқи кадом бандҳо муҷозот хоҳанд шуд.
Хидмати низомии дусола дар Тоҷикистон барои ҷавонони аз 18 то 28 сола иҷборӣ буда ва танҳо дар сурати дар ҳоли таҳсил будан, доштани ду фарзанд, ноновари аслии хонавода будан, танҳо писар дар хонавода ва ё бемор будан аз хидмат маъоф ҳастанд.
Вале бештари ҷавонон ба далоили мухталиф, бавижа шароити номатлуби хидмати сарбозӣ, тарҷеҳ додаанд барои сафар ба муҳоҷирати корӣ аз хидмат дар артиш сарпечӣ кунанд.
Коршиносон мегӯянд, ба ин далел мавориди "облава" ё боздошти ҷавонон дар хиёбонҳо дар Тоҷикистон мушоҳида мешавад. Ба гуфтаи онҳо беш аз 60 дарсади ҷавонон ба ин васила ба артиш эъзом мешаванд.
Аммо бар асоси итилоъи кумисориёи низомӣ ва додситони низомӣ дар вилояти Хатлон онҳо дар мавсими даъвати баҳории имсол шикоётеро аз сокинони ин вилоят дар мавриди ҷалби иҷбории ҷавонон ба хидмати низомӣ дарёфт накардаанд.