Дархост аз Бег Зуҳуров барои боз шудани дастрасӣ ба сойти ҳизби наҳзат
Мақомоти Ҳизби наҳзати исломии Тоҷикистон гуфтаанд, аз рӯзи 25 апрели соли ҷорӣ дастрасии муштариён ба сойти расмии ин ҳизб, “nahzat.tj”, “nahzat.net” ва “nahzat.org” мушкил шудааст.
Ин ҳизб зимни ирсоли номаи расмӣ аз Бег Зуҳуров, раиси Идораи иртибототи Тоҷикистон хостааст, дар муддати се рӯзи оянда ин идора тавзеҳ бидиҳад, ки сабаби мушкили дастрасӣ ба сойти расмии Ҳизби наҳзати исломии Тоҷикистон дар чист.
Ба гуфтаи Маҳмудҷон Файзраҳмонов, як тан аз масъулони сойти Ҳизби наҳзати исломӣ, феълан дастрасӣ ба сойтҳои ин ҳизб тавассути фароҳамкунандаи интернети Бабилон, Мегафон, Эстера, Индиго, Сатурн, Билайн ва Tojnet масдуд аст.
Асомиддин Атоев, раиси Анҷумани фароҳамкунандагони интернети Тоҷикистон, дастдас набудани дастрасӣ ба сойтҳои “nahzat.tj”, “nahzat.net” ва “nahzat.org”-ро тавассути бархе аз ширкатҳои фароҳамгари интернетӣ таъйид кард.
Ӯ таъкид кард, ки қаблан мавориди масдуд шудани бархе аз сойтҳо дар Тоҷикистон умдатан дар пайи дастури катбии Идораи алоқа ба фароҳамкунандагони интернет сурат мегирифт.
Ҳарчанд дар номаи масъулони ҳизб ба Идораи иртиботот омадааст, ки мақомоти ин идора гуфтаанд дастрасӣ ба ин сойт ба далоили фаннӣ масдуд аст, аммо на мақомоти Идораи иртибототи Тоҷикистон ва на фароҳамгарони интернет (провайдер) то ҳоло дар бораи сабаби мушкилоти марбут ба дастрасии муштариён ба сойти ҳизби наҳзат ибрози назари умумӣ накардаанд.
Дар номаи ҲНИТ ба Идораи иртибототи Тоҷикистон аз ҷумла омадааст, ки масдуд шудани сойти ҳизби мухолиф суханронии ахири раиси ҷумҳури кишварро дар бораи фароҳам будани заминаҳо барои фаъъолияти аҳзоби мухталифи сиёсӣ дар кишвар таҳти савол қарор медиҳад.
Дар ин нома нақли қавле аз паёми ахири раиси ҷумҳури Тоҷикистон дар ин бора оварда шудааст, ки гуфтааст: “Мо аллакай шоҳиди густариши раванди гуногунандешии сиёсӣ, рушди босуръати фаъолияти аҳзоби сиёсӣ ва ниҳодҳои гуногуни ҷомеъаи шаҳрвандӣ дар кишварашон ҳастем ва дар ин самт аз ҷониби давлат ва ҳукумати Тоҷикистон барои фаъолият озоди онҳо ҳамаи шароити мусоъид фароҳам оварда шудааст.”
Дар идомаи ин нукта дар нома мехонем: “Оё ҳамин аст фароҳамоварии шароити мусоъид ба аҳзоби сиёсӣ?”
Масъулони бахши фании ҲНИТ иддаъҳо мабнӣ бар далели мушкилоти фаннӣ масдуд шудани сойти ҳизбро рад карда ва мегӯянд, ин сойт дар хориҷ аз Тоҷикистон бидуни мушкил боз шуда ва дар дохили кишвар низ муштариён бо истифода аз филтершиканҳо метавонанд вориди сойт бишаванд.
Зимнан, Муҳиддин Кабирӣ, раҳбари Ҳизби наҳзати исломии Тоҷикистон, дар маросими таҷлил аз 40-умин солгарди таъсиси ин ҳизб дар авохири моҳи гузашта дар бораи фишорҳои зиёди ниҳодҳои давлатӣ болои ҳизб ва аъзои он дар сартосари Тоҷикистон сӯҳбат карда ва аъзои ҲНИТ-ро дар борабари ин фишорҳо ба таҳаммул ва хештандорӣ даъват карда буд.